பிரசாந்தனின் பிணை கோரிய மனுத் தொடர்பான வழக்கு ஒத்திவைப்பு

-எம்.எஸ்.எம்.நூர்தீன்

இரட்டைக் கொலைச் சம்பவம் தொடர்பில் கைதுசெய்யப்பட்டு விளக்கமறியலில் வைக்கப்பட்டுள்ள தமிழ் மக்கள் விடுதலைப் புலிகள் கட்சியின் செயலாளரும் கிழக்கு   மாகாண சபையின் முன்னாள் உறுப்பினருமான பூ.பிரசாந்தனுக்கு பிணை கோரிய மனுத் தொடர்பான வழக்கு மட்டக்களப்பு மேல் நீதிமன்றத்தால் மீண்டும் ஒத்திவைக்கப்பட்டது.

சந்தேக நபரான பூ.பிரசாந்தனுக்கு பிணை வழங்குமாறு கோரி மட்டக்களப்பு மேல் நீதிமன்றத்தில் தாக்கல் செய்யப்பட்ட மனு மீதான விசாரணைக்காக இன்று திங்கட்கிழமை அவர் மட்டக்களப்பு மேல் நீதிமன்றத்துக்கு அழைத்துவரப்பட்டார். நீதிமன்றத்தில் இந்த வழக்கு எடுத்துக்கொள்ளப்பட்டபோது, எதிர்வரும் 30ஆம் திகதிக்கு மட்டக்களப்பு மேல் நீதிமன்ற நீதிபதி திருமதி வி.சந்திரமணி ஒத்திவைத்தார்.

2008ஆம் ஆண்டு டிசெம்பர் மாதம் 29ஆம் திகதி மட்டக்களப்பு, ஆரையம்பதிப் பிரதேசத்தில் இடம்பெற்றதாகக் கூறப்படும் இரட்டைக் கொலைச் சம்பவத்தில் அரசாங்கப் பாடசாலை ஒன்றின் ஆசிரியரான தமிழ்நாடு என அழைக்கப்படும் கிருஸ்ணபிள்ளை மனோகரன் மற்றும் பெண் ஒருவரும் சுட்டுக்கொல்லப்பட்டிருந்தனர். இந்தக் கொலைச் சம்பவம் தொடர்பில் பூ.பிரசாந்தன் மற்றும் அவரது சகோதரர் பூ.ஹரனும் கைதுசெய்யப்பட்டு, அவர்களுக்கான விளக்கமறியல் இம்மாதம் 28ஆம் திகதிவரை நீடிக்கப்பட்டுள்ளது.