’ஆற்றை அகலப்படுத்தவும்’

ஆ.ரமேஸ்

நுவரெலியா கந்தப்பளை பகுதியில், விவசாய நிலத்தையும் அதனை அண்டிய குடியிருப்புப் பகுதிகளையும் பாரிய பாதிப்புக்குள்ளாக்கும் ஆற்றை, அகலப்படுத்துமாறு பிரதேசவாசிகள் கோரிக்கை விடுத்துள்ளனர்.

கந்தப்பளை பாக்குத் தோட்ட பச்சை வனப்பகுதியிலிருந்து ஆரம்பமாகும் காட்டாறு, கந்தப்பளை நகர் மற்றும் கிராமப்பகுதியின் ஊடாக, கல்பாலம் வரையில் சுமார் ஏழு கிலோமீற்றர் வரை செல்கின்றது.

மழைகாலங்களில் இந்த ஆறு பெறுக்கெடுப்பதால், கந்தப்பளை நகரை அண்டிய கிராமவாசிகளினதும் பாக்குத் தோட்ட மக்களதும் விவசாயக் காணிகள் மற்றும் விவசாய செய்கைகள் பாதிப்படைகின்றன.

இதனால் இப்பகுதியில், பாரியளவில் விவசாயப் பயிர்கள் பாதிப்புக்குள்ளாவதுடன், மண்ணரிப்பும் ஏற்படுகின்றது.
இவ்விடயம் தொடர்பில் நுவரெலியா மாவட்ட விவசாயத் திணைக்களம் மற்றும் மத்திய மாகாண விவசாயத்துறை அமைச்சு என்பனவற்றின் கவனத்துக்குக் கொண்டுச்சென்ற போதிலும் இதுவரை எவ்வித நடவடிக்கையும் எடுக்கப்படவில்லை. எனவே, சம்பந்தப்பட்ட அதிகாரிகள் இந்த ஆற்றை அகலப்படுத்துவதற்கு நடவடிக்கைகளை மேற்கொள்ள வேண்டுமென்று, பிரதேச மக்கள் கோரிக்கை விடுக்கின்றனர்.