இயற்கை வளங்களைப் பாதுகாப்பது சகலரதும் கடமையாகும்

நாட்டின் இயற்கை வளங்களை அழியாது பாதுகாத்து நாட்டின் எதிர்காலத்தினை சிறந்த வழியில் இட்டுச் செல்வது மனிதர்களாகிய அனைவரதும் கடமையாகும் என  ஜனாதிபதி மைத்திரிபால சிறிசேன தெரிவித்துள்ளார்.

நாட்டில் வன அடர்த்தியானது தற்போது 29 சதவீதமாக காணப்படுகிறது. இந்த அடர்த்தி சதவீதத்தினை 32 சதவீதமாக அதிகரிப்பதற்கு நடவடிக்கை எடுக்கவுள்ளதாகவும் அவர் தெரிவித்துள்ளார்.

 'வனரோபா' தேசிய மரநடுகை நிகழ்ச்சித்திட்டத்தை ஆரம்பிக்கும் முகமாக நடைபெற்ற தேசிய நிகழ்வு ஞாயிற்றுக்கிழமை(11) கொத்மலையில் இடம்பெற்றது.

இந்நிகழ்வில், கலந்து கொண்டு உரையாற்றிய போதே ஜனாதிபதி இவ்வாறு தெரிவித்தார். அங்கு உரையாற்றிய ஜனாதிபதி,
நாட்டிலுள்ள கள்ளக்கடத்தற்காரர்கள் பலர், நாட்டின் சுற்றுப்புறச் சூழலை அழித்து தமது வர்த்தக நடவடிக்கைகளை மேற்கொண்டு வருகின்றனர்.

இவ்வாறான தொழிலில் ஈடுபடுபவர்கள் பணத்தினை மட்டுமே கருத்தில் கொள்கின்றனர். ஆனால், நாட்டைப் பற்றியோ நாட்டின் எதிர்காலம் பற்றியோ எந்தவித கவலையும் கொள்வதில்லை.

எனவே, இவ்வாறானவர்களின் நடவடிக்கைகளை குறைக்கும் முகமாக கடும் சட்டதிட்டங்கள் நடைமுறைப்படுத்தப்பட வேண்டும். நாட்டின் இயற்கை வளங்களை அழியாது பாதுகாத்து நாட்டின் எதிர்காலத்தினை சிறந்த வழியில் இட்டுச் செல்வது மனிதர்களாகிய அனைவரதும் கடமையாகும்.

 ஆயினும், கடந்த சில வருடங்களில் காட்டு வளங்கள் எமது நாட்டில் அதிகமாக அழிக்கப்பட்டு வருகின்றன. எனவே, இனிவரும் காலங்களில் வன அழிப்பினை நிறுத்தி வனாந்தரங்களின் அடர்த்தியை அதிகரித்து நாட்டின் எதிர்காலத்தினை சிறப்பாக அமைப்பது எமது கடமை என்றார்.