நீச்சல் தடாகத்தில் மூழ்கி 10 வயது சிறுவன் பலி

தலவாக்கலை- வட்டகொடையைச் சேர்ந்த 10 வயது சிறுவனொருவன், மாரவில பகுதியில் அமைந்துள்ள நீச்சல் தடாகத்தில் மூழ்கி உயிரிழந்துள்ளதாக, மாரவில பொலிஸார் தெரிவித்துள்ளனர்.

தேவநாயகம் ருசாந்தன் என்ற சிறுவனே இவ்வாறு உயிரிழந்துள்ளார்.

தலவாக்கலை நகரிலுள்ள நகைக்கடை ஒன்றில் பணிபுரியும் பணியாளர்கள், தத்தமது குடும்பத்தினருடன்  மாரவில பகுதிக்கு கடந்த 25ஆம் திகதி சுற்றுலா வந்துள்ளதுடன், அங்கு அமைந்துள்ள பிரபலமான ஹோட்டல் ஒன்றிலுள்ள நீச்சல் தடாகத்தில் நீராடியப் போதே, இந்தச் சம்பவம் இடம்பெற்றுள்ளதாகப் பொலிஸார் தெரிவித்துள்ளனர்.

குறித்த சிறுவன் நீரில் மூழ்கியதை அவதானித்த அவனது தந்தை , சிறுவனை நீச்சல் தடாகத்திலிருந்து  வெளியே எடுத்து, ஹோட்டல் பணியாளர்களுடன் இணைந்து சிறுவனை மாரவில வைத்தியசாலைக்கு கொண்டுச் சென்றுள்ளார்.

இதன் போது சிறுவன் உயிரிழந்துள்ளதாக வைத்தியர்கள் அறிவித்துள்ளதுடன், சம்பவம் தொடர்பான விசாரணைகளை மாரவில பொலிஸார் முன்னெடுத்து வருவதாகத் தெரிவித்துள்ளனர்.