அஸாத் சாலி வெளிநாடுசெல்வதை தடுக்க நீதவான் உத்தரவு

(லக்மால் சூரியகொட)

கொழும்பு மாநகர சபையின் முன்னாள் பிரதிமேயர் அஸாத் சாலி,  வெளிநாடு செல்வதை தடுக்குமாறு குடிவரவு குடியகல்வு கட்டுப்பாட்டாளருக்கு கொழும்பு கோட்டை நீதவான் இன்று திங்கட்கிழமை உத்தரவு பிறப்பித்துள்ளார்.

தனக்கு பதவி உயர்வொன்றை பெற்றுத்தருவதற்காக 600,000 ரூபா பணம்பெற்றுக்கொண்டு மோசடி செய்தார் என சுகாதார அமைச்சின் ஊழியர் ஒருவர் கொழும்பு குற்றப் புலனாய்வுப் பிரிவில்  செய்த முறைப்பாடு தொடர்பாகவே இந்த உத்தரவு பிறப்பிக்கப்பட்டுள்ளது.

இவ்விவகாரத்தில் தொடர்புடையதாக கூறப்படும் மற்றொரு சந்தேக நபரான பாத்திமா ரிஸானா எனும்பெண்ணும் வெளிநாடு செல்வதை தடுக்குமாறு கொழும்பு கோட்டை நீதவான் உத்தரவு பிறப்பித்துள்ளார்.

இவ்விரு சந்தேக நபர்கள் தொடர்பாக இதேபோன்ற 8 முறைப்பாடுகள் உள்ளதாக கொழும்பு குற்றப் புலனாய்வு பிரிவினர் தெரிவித்தனர். 

முல்லேரியாவில் வசிக்கும் ஒருவரே இந்த முறைப்பாட்டை செய்துள்ளார். தனது சகோதரி, கொழும்பு  3 இல் வசிக்கும் பாத்திமா ரியானா என்பவருக்கு அறிமுகமானதாகவும் ரியானா மூலம் அஸாத் சாலி தனக்கு அறிமுகமானதாகவும்  அவர் தெரிவித்துள்ளார்.

பதவியுயர்வு பெற்றுக்கொடுப்பதாக உறுதியளித்து அஸாத் சாலி தனது பிரசாரங்களுக்காக 700,000 ரூபா கேட்டதாகவும்; பொலிஸாரிடம் முறைப்பாட்டாளர் தெரிவித்துள்ளார். எனினும் 02.02.2010 ஆம் திகதி பாத்திமா ரியானா முன்னிலையில் தான் அஸாத் சாலிக்கு 600,000 ரூபா வழங்கியதாகவும் எனினும் உறுதியளித்தபடி தனக்கு பதவி உயர்வு பெற்றுக்கொடுக்கவில்லை எனவும் முறைப்பாட்டாளர் கூறியுள்ளார்.

இது தொடர்பாக கொழும்பு கோட்டை நீதவான் லங்கா ஜயரட்ன முன்னிலையில் மனுவொன்றை தாக்கல் செய்த கொழும்பு குற்றப்புலனாய்வுப் பிரிவினர், சந்தேக நபர்கள் இருவரும் நாட்டைவிட்டுச் செல்ல முயற்சிப்பதாக  நம்பத்தகுந்த வட்டாரங்கள் தெரிவிப்பதாக கூறினர்.

இந்நிலையில், சந்தேக நபர்கள் இருவரும் நாட்டைவிட்டு வெளியேறுவதை தடுக்குமாறு குடிவரவு மற்றும்  குடியகல்வு கட்டுப்பாட்டாளருக்கு நீதவான் உத்தரவிட்டார்.  இவ்வழக்கு விசாரணை செப்டெம்பர் 2 ஆம் திகதிக்கு ஒத்திவைக்கப்பட்டது.