வாகனங்களையும் இராணுவ வீரர்களையும் தாக்கிய நபர் துப்பாக்கிச் சூட்டில் பலி; சிப்பாய் படுகாயம்

(கிரிசன், கிருஷ்ணன்)

சாவகச்சேரி,  புத்தூர் சந்தியில் இன்று வெள்ளிக்கிழமை பிற்பகல் வீதியிலிருந்த வாகனங்களை தாக்கி உடைத்த நபர் மீது இராணுவத்தினர் மேற்கொண்ட துப்பாக்கிச் சூட்டில் அந்நபர் ஸ்தலத்திலேயே பலியாகியுள்ளார்.

குறித்த நபர் போக்குவரத்தில் ஈடுபட்ட  வாகனங்களை இரும்புக் கம்பியால் தாக்கி உடைத்ததுடன், அதனை தடுக்க முற்பட்ட இராணுவ வீரர் ஒருவரையும் தாக்கி காயப்படுத்தியுள்ளார்.

மற்றொரு இராணுவ வீரரையும் தாக்க முற்பட்ட அந்நபர் மீது இராணுவத்தினர் துப்பாக்கிச் சூடு நடத்தியுள்ளனர்.

இதனால், குறித்த நபர் சம்பவ இடத்திலேயே உயிரிழந்துள்ளார். அவரின் சடலம் தற்போது யாழ். போதனா வைத்தியசாலையில் வைக்கப்பட்டுள்ளது.

சம்பவ இடத்திற்கு விரைந்த சாவகச்சேரி பொலிஸார் விசாரணைகளை மேற்கொண்டுள்ளனர்.

இதேவேளை, மேற்படி நபரின் தாக்குதலில் காயமடைந்த 22 வயதான எம்.டி.சில்வா எனும் இராணுவ வீரர் யாழ். போதானா வைத்தியசாலையில் அனுமதிக்கப்பட்டுள்ளார்.