தடுத்து வைக்கப்பட்டுள்ளவர்களின் பெயர் விபரங்களை வெளியிடாவிடில் மக்கள் சக்திப் போராட்டம்: மாவை எம்.பி

(கவிசுகி)

கைதுசெய்யப்பட்டு தடுத்துவைக்கப்பட்டுள்ளவர்களின் பெயர் விபரங்களை அரசாங்கம் வெளியிட வேண்டுமெனவும் அவ்வாறில்லாவிடின் மாபெரும் மக்கள் சக்திப் போராட்டம்  ஜனநாயக ரீதியில்  வெடிக்குமென தமிழ்த் தேசியக் கூட்டமைப்பின் நாடாளுமன்ற உறுப்பினர் மாவை சேனாதிராஜா தெரிவித்துள்ளார்.

மனித உரிமைகள் தினத்தையொட்டி காணாமல்ப் போன உறவுகளை கண்டுபிடித்துத் தருமாறு கோரி காணாமல்ப் போனவர்களின் உறவினர்கள் யாழ். பஸ் நிலையத்தில் இன்று சனிக்கிழமை ஆர்ப்பாட்டமொன்றில் ஈடுபட்டனர்.  இந்த ஆர்ப்பாட்டத்தில் கலந்துகொண்ட காணாமல்ப் போனவர்களின்  உறவினர்கள் கண்ணீர் மல்கிக் கதறியழுதனர். அவ்விடத்திற்கு சென்றபோதே நடாளுமன்ற உறுப்பினர் மாவை சேனாதிராஜா மேற்படி தெரிவித்தார்.

நாடாளுமன்ற உறுப்பினர் மாவை சேனாதிராஜா இங்கு மேலும் தெரிவிக்கையில்...

இந்த அரசாங்கம் தமிழ் மக்களை அநாதைகளாக வீதியில் அலையவிடுகிறது. மக்கள் வீடுகளில் நிம்மதியாக வாழமுடியாதவர்களாக தவிக்கின்றார்கள்.

சிறைச்சாலைகளில் அல்லது இரகசிய முகாம்களில் தடுத்துவைக்கப்பட்டுள்ளவர்களின் உண்மை நிலையை அரசாங்கம் வெளியிட வேண்டும். அவ்வாறு வெளியிடத் தவறும் பட்சத்தில் நாடளாவிய ரீதியில் சாத்வீகப் போராட்டம் முடுக்கிவிடப்படும்' என்றார்.

'காணாமல்ப் போனவர்களின் விபரங்களை வெளியிடு', 'தேசியப் பிரச்சினைக்கு நிரந்தரத் தீர்வை முன்வை', 'அரசியல்க் கைதிகளை விடுதலை செய்', 'ஜனநாயக உரிமைகளை நசுக்காதே', 'காணாமல்ப் போனவர்களின் பெற்றோரை வதைக்காதே' என்ற வாசகங்கள் எழுதப்பட்ட  சுலோகங்களை இந்த ஆர்ப்பாட்டத்தில் கலந்துகொண்டவர்கள் தாங்கியிருந்தனர்.

இதேவேளை, இவ் ஆர்பாட்டத்தில் செய்திகளை சேகரிக்க சென்ற ஊடகவியலாளர்களில் சிலர் -பொலிஸ் ஒருவரினால் தாக்கப்பட்டுள்ளதுடன் பொலிஸாருக்கும் ஊடகவியலாளர்களுக்கும் இடையில் வாக்குவாதமும் ஏற்பட்டுள்ளது.

இதன்போது தாக்கப்பட்ட ஊடகவியலாளர்கள் 'நாங்கள் ஆர்ப்பாட்டக்காரர்கள் அல்ல. செய்தி சேகரிக்க வந்த ஊடகவியலாளர்கள்' என்று பொலிஸாருக்கு தெரிவித்துள்ளனர்.

இதனையடுத்து யாழ்.பொலிஸ் தலைமைப்  பொறுப்பதிகாரி சமன் சிகேரா இவ்விடயத்தில் தலையிட்டு ஊடகவியலாளர்களை சமாதானப்படுத்தியுள்ளார்.