கஜேந்திரகுமார் உட்பட 11 பேரை தனிமைப்படுத்த உத்தரவு

-எம்.றொசாந்த்

அரசாங்கத்தால் முன்னெடுக்கப்படும் கொரோனா வைரஸ் தடுப்பு நடவடிக்கைகளை மீறியுள்ளதாக யாழ். பொலிஸாரால் குற்றஞ்சுமத்தப்பட்டுள்ள தமிழ்த் தேசிய மக்கள் முன்னணியின் தலைவர் கஜேந்திரகுமார் பொன்னம்பலம் உள்ளிட்ட அந்த முன்னணியின் 11 பேரை தனிமைப்படுத்துமாறு, யாழ். நீதவான் நீதிமன்ற நீதவான் ஏ. பீற்றர் போல், இன்று (17) உத்தரவு பிறப்பித்தார்.

யாழ்ப்பாணத்தில் நடைபெற்ற முள்ளிவாய்க்கால் நினைவேந்தல் வார நிகழ்வுகளில் கலந்துகொண்ட தமிழ்த் தேசிய மக்கள் முன்னணியின் தலைவர் கஜேந்திரகுமார், அதன் பொதுச்செயலாளர் செல்வராஜா கஜேந்திரன், தேசிய அமைப்பாளர் விஸ்வலிங்கம் மணிவண்ணன், சட்ட ஆலோசகர்களான சுகாஸ், காண்டீபன், யாழ். மாநகரசபை உறுப்பினர்களான பார்த்தீபன், தனுசன், கிருபாகரன், விஸ்ணுகாந்த, சுகாதாரன், தமிழ்மதி உள்ளிட்ட 11 பேரையே தனிமைப்படுத்தலுக்கு உட்படுத்துமாறு, நீதிமன்றம் உத்தரவிட்டுள்ளது.

11 பேரையும் அவர்கள் வீடுகளில் 14 நாள்கள்  தனிமைப்படுத்தி அவர்களை கண்காணித்து, 14 நாள்களின் பின்னர் நீதிமன்றுக்கு அறிவிக்குமாறு, அந்தந்தப் பிரதேச வைத்திய அதிகாரிகளுக்கு நீதவான் பணித்துள்ளார். இதையடுத்து, நீதவானின் கட்டளையை, இன்றைய தினம், பொலிஸார், பெயர் குறிப்பிடப்பட்டுள்ள நபர்களின் வீடுகளுக்குச் சென்று கையளித்துள்ளனர்.