மல்லாகம் சந்தியில் விபத்து; மூன்று இளைஞர்கள் படுகாயம்

-செந்தூரன் பிரதீபன் 

தெல்லிப்பளை பொலிஸ் பிரிவுக்குட்பட்ட மல்லாகம் சந்திப் பகுதியில், இன்று (06) காலை இடம்பெற்ற விபத்தில், 3 இளைஞர்கள் படுகாயமடைந்துள்ளனர்.

3 மோட்டார் சைக்கிள்கள் ஒன்றுடன் ஒன்று மோதி விபத்துக்குள்ளானதிலேயே, மோட்டார் சைக்கிள்களைச் செலுத்திச் சென்ற 3 இளைஞர்களும் படுகாயமடைந்துள்ளனர்.

இவ்வாறு படுகாயமடைந்தவர்கள், தெல்லிப்பளை ஆதார வைத்தியசாலையில் அனுமதிக்கப்பட்டு, பின்னர் மேலதிக சிகிச்சைக்காக யாழ்ப்பாணம் போதனா வைத்தியசாலைக்கு மாற்றப்பட்டுள்ளனர்.

இவர்களில் ஒருவர் அதிதீவிர சிகிச்சைப் பிரிவில் அனுமதிக்கப்பட்டுள்ளார்.

அதிக வேகமே, இந்த விபத்துக்குக் காரணமென, ஆரம்பகட்ட விசாரணைகளில் இருந்து தெரியவந்துள்ளது.