புத்தளத்தில் இடம்பெற்ற அசம்பாவிதத்துக்கு கண்டனம்

(எம்.என்.எம்.ஹிஜாஸ், ஹிரான் பிரியங்கர ஜயசிங்க )

புத்தளம் நகர சபை, புத்தளம் பெரிய பள்ளி நிர்வாகம், உலமா சபை ஆகியன புத்தளத்தில் அண்மையில் நடைப்பெற்ற அசம்பாவிதத்தினை வன்மையாக கண்டிப்பதாக இன்று புத்தளத்தில் நடைப்பெற்ற ஊடகவியலாளர் மாநாட்டில் புத்தளம் நகரபிதா கே.ஏ.பாயிஸ் தெரிவித்தார்.

புத்தளம் பெரியபள்ளி நிர்வாக சபைத்தலைவர் முஸம்மில், நகர சபை உறுப்பினர் முஜாஹித்துல்லா, முன்னாள் மாகாணசபை உறுப்பினர் நியாஸ் மற்றும் நகர சபை செயலாளர் ஆகியோர் கலந்துகொண்ட இந்த ஊடகவியலாளர் சந்திப்பின் போது அவர் தொடர்ந்து தெரிவிக்கையில்,

'இந்த அசம்பாவிதச் செயலுக்கு காரணமாக இருந்தவர்களை புத்தளம் மக்களின் உதவியுடன் பொலிஸார் கைது செய்துள்ளதாகவும் அவர்களில் 99 வீதமானவர்கள் பாதாள குழுவினரும், அரச விரோத செயலில் ஈடுபடுபவர்களும் ஆவர்.

குறித்த சம்பவம் நடைப்பெற்ற இடத்துக்கு தான் பயணம் செய்தபோது தனது வாகனத்தின் மீதும் தாக்குதல் நடத்தப்பட்டதைச் சுட்டிக்காட்டிய அவர், இதற்கு பின்னயில் அரசுக்கு எதிரான சக்திகளே செயற்படுவதாகவும் தெரிவித்தார்.

இதே வேளை அசம்பாவிதத்தில் கொல்லப்பட்ட பொலிஸ் உத்தியோகத்தரின் குடும்பத்தாருக்கு அனுதாபத்தினை தெரிவிப்பதுடன் இதனுடன் தொடர்புடைய குற்றவாளிகளுக்கு அதி உயர் தண்டனை கிடைக்க புத்தளம் மக்கள் ஆதரவு வழங்குவார்களெனவும் குறிப்பிட்டார்.

நடைப்பெற்ற அசம்பாவிதம் தொடர்பில் பொலிஸாரிடமும்  பெரும்பான்மை மக்களிடமும் புத்தளம் மக்கள் சார்பாக மன்னிப்பு கோருவதாக தெரிவித்தார்.