வைத்தியசாலையில் குழந்தைகளை கடத்த முற்பட்டதாக குற்றஞ்சாட்டப்பட்டவருக்கு விளக்கமறியல்

(ஆகில் அஹமட்)

அநுராதபுரம் போதனா வைத்தியசாலையின் குழந்தைகள் வார்ட் தொகுதிக்குள் அனுமதியின்றி உட்பிரவேசித்து, குழந்தைகளை கடத்திச்செல்ல முற்பட்ட குற்றச்சாட்டில் கைதுசெய்யப்பட்ட சந்தேக நபரை எதிர்வரும் 8ஆம் திகதி வரை விளக்கமறியலில் வைக்குமாறு அநுராதபுரம் பதில் நீதவான் சஜீவ குணரத்ன உத்தரவிட்டார்.

நேற்று சனிக்கிழமை அநுராதபுரம் போதனா வைத்தியசாலையின் குழந்தைகள் வார்ட் தொகுதிக்குள்  அனுமதியின்றி உட்பிரவேசிக்க முற்பட்டதாகத் தெரிவிக்கப்படும் மேற்படி நபரை வைத்தியசாலை பாதுகாப்புப் பிரிவினர் பிடித்து வைத்தியசாலை பொலிஸாரிடம் ஒப்படைத்தனர். இதனைத் தொடர்ந்து குறித்த நபர் நேற்றையதினமே  பதில் நீதவான் முன்னிலையில் ஆஜர்படுத்தப்பட்ட நிலையிலேயே அவர் இந்த உத்தரவைப் பிறப்பித்தார்.

அத்துடன், இந்த  சம்பவம் குறித்து விரிவான விசாரணை மேற்கொண்டு அறிக்கை சமர்ப்பிக்குமாறும் இதன்போது நீதவான் உத்தரவிட்டார்.