பங்குச்சந்தை மற்றும் தங்கம் விலை, நாணயமாற்று வீத நிலைவரங்கள்

-சேகர்

 

பங்குச்சந்தை கொடுக்கல் வாங்கல் ஏற்றத்தாழ்வுகள் நிறைந்த வாரத்தை பதிவு செய்திருந்தன. பங்குமுதலீட்டாளர்கள் இலாபமீட்டும் செயற்பாட்டின் காரணமாக பங்குவிற்பனையில் ஈடுபட்டிருந்ததை அவதானிக்க முடிந்தது. இதன்காரணமாக வாரத்தின் ஓரிரு நாட்கள் பங்குச்சந்தை சுட்டிகள் சரிவான பெறுமதிகளை பதிவு செய்திருந்தன. ஸ்ரீலங்கா ரெலிகொம், நெஸ்லே, புக்கிட் தாரா மற்றும் கார்சன்ஸ் கம்பர்பெட்ச் ஆகிய பங்குகள் கடந்த வாரம் சந்தையில் விலைச்சரிவில் பெருமளவு பங்களிப்பை வழங்கியிருந்தன. வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 6,263.46 ஆகவும், S&P ஸ்ரீலங்கா 20 சுட்டி 3454.61 ஆகவும் பதிவாகியிருந்தன.

 

மே 26ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 4,020,918,925 அமைந்திருந்தது. கடந்த வாரம் மொத்தமாக 27,577 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 26,472 ஆகவும் வெளிநாட்டு கொடுக்கல் வாங்கல்கள் 1,105 ஆகவும் பதிவாகியிருந்தன.

 

திங்கட்கிழமை

குறைந்த புரள்வு பெறுமதியாக 291 மில்லியன் ரூபா பதிவாகியிருந்ததுடன், சந்தை நேர் பெறுமதிகளை பதிவு செய்திருந்தது. குறிப்பாக ஸ்ரீலங்கா ரெலிகொம், ஏசியன் ஹோட்டல்ஸ் அன்ட் புரொப்பர்டீஸ் அன்ட் லயன் பிரெவரி ஆகிய பங்குகள் மீது விலை உயர்வுகள் பதிவாகியிருந்தன. ஜோன் கீல்ஸ் ஹோல்டிங்ஸ் மற்றும் லங்கா ஐஓசி பங்குகள் மீது நிறுவனசார் மற்றும் உயர் நிகர பெறுமதியான முதலீட்டாளர் ஈடுபாடு காணப்பட்டது. த ஃபினான்ஸ் கம்பனி பங்குகள் மீது சிறியளவிலான பங்குதாரர்களின் ஈடுபாடு காணப்பட்டது. பீபிள்ஸ் லீசிங் அன்ட் ஃபினான்ஸ் பங்குகள் மீது கலப்பு ஈடுபாடு பதிவாகியிருந்தது.

 

செவ்வாய்க்கிழமை

சந்தை விலைச்சரிவை பதிவு செய்திருந்தது, இதில் ஸ்ரீலங்கா ரெலிகொம் அதிக பங்களிப்பை வழங்கியிருந்தது. ஆயினும், புரள்வு பெறுமதி 1 பில்லியன் ரூபாவை கடந்திருந்தது. நிதியியல் துறையின் பங்களிப்பு 84 வீதமாக அமைந்திருந்தது. என்ட்ரஸ்ட் செக்கியுரிட்டீஸ், மல்ட்டி ஃபினான்ஸ் மற்றும் ஏசியா அசெட் ஃபினான்ஸ் ஆகிய பங்குகள் மீது சந்திப்புகள் பதிவாகியிருந்தன. மேலும் லாஃவ்ஸ் காஸ், த ஃபினான்ஸ் வாக்குரிமையற்ற பங்குகள் மற்றும் கொலம்போ லான்ட் அன்ட் டிவலப்மன்ட் பங்குகள் மீது சிறியளவிலான முதலீட்டாளர் ஆர்வத்தை செலுத்தியிருந்தனர். வெளிநாட்டு செயற்பாடுகள் என்பது ஏற்றத்தாழ்வுகளுடன் பதிவாகியிருந்தது.

 

புதன்கிழமை

வியாபாரம் இடம்பெற்ற மத்திய காலப்பகுதியில் சந்தை சரிவான பெறுமதிகளை பதிவு செய்திருந்த போதிலும், கொடுக்கல் வாங்கல்கள் நிறைவின் போது சுட்டிகள் நேர் பெறுமதிகளை பதிவு செய்திருந்தன. என்ட்ரஸ்ட், செலிங்கோ இன்சூரன்ஸ் மற்றும் கொமர்ஷல் வங்கி ஆகியவற்றின் மீது சந்திப்புகள் பதிவாகியிருந்தன. ரேணுகா அக்ரி மற்றும் மாரவில றிசோர்ட்ஸ் ஆகியவற்றின் மீது சிறியளவிலான முதலீட்டாளர்களின் ஈடுபாடு காணப்பட்டது. லைட்ஹவுஸ் ஹோட்டல்ஸ் மற்றும் டிப்ட் புரொடக்ட்ஸ் பங்குகளின் மீது கலப்பு ஈடுபாடு பதிவாகியிருந்தது.

 

வியாழக்கிழமை

ஸ்ரீலங்கா ரெலிகொம், புக்கிட் தாரா மற்றும் கொமர்ஷல் வங்கி ஆகிய பங்குகளின் மீது விலை உயர்வுகள் பதிவாகியிருந்தமை காரணமாக சுட்டிகள் நேர்பெறுமதியில் நிறைவடைந்திருந்தன. ஜோன் கீல்ஸ் ஹோல்டிங்ஸ், கொமர்ஷல் வங்கி மற்றும் டெக்ஸ்ச்சர்ட் ஜேர்சி லங்கா ஆகிய பங்குகள் மீது உயர் நிகர பெறுமதியான ஈடுபாடு காணப்பட்டது. டோக்கியோ சீமெந்து பங்குகள் மீது சிறியளவிலான ஈடுபாடு காணப்பட்டது. லங்கா ஐஓசி பங்குகள் மீது கலப்பு ஈடுபாடு காணப்பட்டது. வெளிநாட்டு கொள்வனவு என்பது புரள்வு பெறுமதியில் 60 வீத பங்களிப்பை வழங்கியிருந்தது.

 

வெள்ளிக்கிழமை

புரள்வு பெறுமதி 1 பில்லியன் ரூபாவை கடந்திருந்த போதிலும், சுட்டிகள் சரிவான பெறுமதியை பதிவு செய்திருந்தன. கார்சன்ஸ் கம்பர்பட்ச், நெஸ்லே மற்றும் புக்கிட் தாரா ஆகிய பங்குகள் மீதான விலைச்சரிவுகள் இந்த விலைச்சரிவுக்கு காரணமாக அமைந்திருந்தன. கார்கில்ஸ், நெஸ்லே, செவ்ரொன் லுப்ரிகன்ட்ஸ் மற்றும் கொமர்ஷல் வங்கி ஆகிய பங்குகள் மீது சந்திப்புகள் பதிவாகியிருந்தன. இவை புரள்வு பெறுமதியின் 43 வீத பங்களிப்பை செலுத்தியிருந்தன. களனி டயர் பங்குகள் மீது சிறியளவிலான முதலீட்டாளர்கள் ஆர்வம் செலுத்தியிருந்தனர். வெளிநாட்டு முதலீட்டாளர்கள் நிகர கொள்வனவாளர்களாக பதிவாகியிருந்தனர்.

 

கடந்த வார கொடுக்கல் வாங்கல் நடவடிக்கைகளில் சிலோன் லெதர் (வாக்குரிமை), த ஃபினான்ஸ் கம். (சாதாரண), எஸ்எம்பி லீசிங் (சாதாரண), த ஃபினான்ஸ் கம். மற்றும் ரோயல் பாம்ஸ் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

லங்கா சென்ச்சரி (உரிமை), பரகன், ஜி எஸ் ஃபினான்ஸ், மேர்க் சிப்பிங் மற்றும் செரன்டிப் லான்ட் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

தங்கம் விலை நிலைவரம்

கடந்த வாரம் 24 கெரட் தங்கத்தின் சராசரி விலை 44,500 ரூபாவாகவும், 22 கெரட் தங்கத்தின் விலை 41,700 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 131.88 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 221.25 ஆக காணப்பட்டிருந்தது.