இந்திய மீனவர்கள் 6 பேருக்கு விளக்கமறியல்

-எஸ்.றொசேரியன் லெம்பேட் 

இலங்கை கடற்பரப்பினுள் அத்துமீறி நுழைந்து, மீன் பிடியில் ஈடுபட்ட நிலையில் கைது செய்யப்பட்ட இந்திய மீனவர்கள் 6 பேரையும் எதிர்வரும் 14ஆம் திகதி வரை விளக்கமறியலில் வைக்குமாறு மன்னார் பதில் நீதவான் வியாழக்கிழமை(9) உத்தரவிட்டார்.

இலங்கை கடற்பரப்பினுள் அத்துமீறி நுழைந்து, இலுவைப்படகு (டோலர்) ஒன்றின் மூலம் மீன் பிடியில் ஈடுபட்ட இந்த 6 மீனவர்களையும் கடல் ரேந்தில் ஈடுபட்ட கடற்படையினர், வியாழக்கிழமை அதிகாலையில் கைது செய்து, தலைமன்னார் கடற்படையினரிடம் ஒப்படைத்தனர்.

தலைமன்னார் கடற்படையினர் விசாரணைகளை மேற்கொண்ட பின்னர், மன்னார் மாவட்ட கடற்றொழில் திணைக்கள அதிகாரிகளிடம் வியாழக்கிழமை மதியம் ஒப்படைத்தனர்.

அதனையடுத்து, கடற்றொழில் திணைக்கள அதிகாரிகள் மன்னார் நீதிமன்றத்தில் ஆஜர்படுத்தினர். விசாரணைகளை மேற்கொண்ட மன்னார் பதில் நீதவான் இ.கயஸ், குறித்த 6 மீனவர்களையும் எதிர்வரும் 14ஆம் திகதி வரை விளக்கமறியலில் வைக்க உத்தரவிட்டார்.

இதேவேளை, இலங்கை கடற்பரப்பினுள் அத்துமீறி நுழைந்து, மீன்பிடியில் ஈடுபட்ட நிலையில் கடந்த 31 ஆம் திகதி அதிகாலை, தலைமன்னார் கடற்பரப்பில் வைத்து கைது செய்யப்பட்ட 7 தமிழக மீனவர்களும் எதிர்வரும் 14 ஆம் திகதிவரை விளக்கமறியலில் வைக்கப்பட்டுள்ளமை குறிப்பிடத்தக்கது.