புதுக்குடியிருப்பு பிரதேச சபையின் தவிசாளர் மாற்றம்

-செ.கீதாஞ்சன்

முல்லைத்தீவு - புதுக்குடியிருப்பு பிரதேச சபையின் தவிசாளர் தெரிவின் போது, தமிழரசு கட்சிக்குள்ளேயே செய்துகொள்ளப்பட்ட ஒப்பந்தத்தின் அடிப்படையில், இருவர் தவிசாளர் பதவியில் வகிப்பதாக தீர்மானிக்கப்பட்டுள்ளதைத் தொடர்ந்து, செ. பிறேமகாந்த், தமிழரசு கட்சியின் சார்பில் 17.03.2018 தொடக்கம் 14.08.2020 வரை பணியாற்றி வந்துள்ளார். 

இவர் கட்சி தீர்மானத்துக்கு ஏற்ப தவிசாளர் பதவியை அதே கட்சியின் பிரதேச சபை உறுப்பினர் அ.தவக்குமாருக்கு வழங்குவதற்காக, தனது பதவியை இராஜினாமா செய்வது தொடர்பான கடிதத்தைத் தமிழரசு கட்சியின் செயலாளரிடம் கையளித்துள்ளார்கள். 

தமிழரசு கட்சியின் பொதுச்செயலாளர் கி.துரைசிங்கத்தின் கையெழுத்து ஊடாக, முல்லைத்தீவு மாவட்ட உதவித் தேர்தல்கள் ஆணையாளருக்கு  புதுக்குடியிருப்பு பிரதேச சபையின் தவிசாளரை மாற்றி புதியவரை நியமிக்க கோரிக்கை விடுக்கப்பட்டுள்ளது.

இதன்படி, செவ்வாய்க்கிழமை (18) வெளியிடப்படும் வர்த்தமானி அறிவித்தலின் பிரகாரம், புதிய பிரதேச சபை உறுப்பினர் அ.தவக்குமார் உத்தியோகபூர்வமாக அறிவிக்கப்படவுள்ளமை குறிப்பிடத்தக்கது.