முல்லை. மாவட்டத்தின் பல தேவைகளை நிவர்த்திசெய்ய வேண்டும்

-சுப்பிரமணியம் பாஸ்கரன்

யுத்தத்தினாலும் ஆழிப்பேரலையினாலும் அதிக பாதிப்புக்களை எதிர்கொண்ட மாவட்டமாக காணப்படும் முல்லைத்தீவு மாவட்டத்தின் பல தேவைகள், நிறைவு செய்யப்பட வேண்டியுள்ளதாக முல்லைத்தீவு மாவட்ட செயலர் ரூபவதி கேதீஸ்வரன் தெரிவித்துள்ளார்.

முல்லைத்தீவு வலயக்கல்வித் திணைக்களத்தின் புதிய கட்டடத்திறப்பு விழா நிகழ்வு புதன்கிழமை (27) பிற்பகபல் நடைபெற்றது. இந்நிகழ்வில் கலந்து கொண்டு உரையாற்றிய போதே அவர் மேற்கண்டவாறு தெரிவித்தார்.

அங்கு தொடர்ந்து தெரிவித்த அவர், 'முல்லைத்தீவு மாவட்டமானது கடந்த கால யுத்தத்தினாலும் ஆழிப்பேரலை அனர்த்;தத்தினாலும் பாதிக்கப்பட்ட ஓர் மாவட்டமாக காணப்படுவதுடன். அதனுடைய, தாக்கங்கள் முல்லைத்;தீவு வலயக் கல்வித் திணைக்களத்தையும் விட்டு வைக்கவில்லை. உருக்குலைந்து சின்னாபின்னமாகிப் போய்க் காணப்பட்ட வலயக்கல்வித் திணைக்களமானது இன்று புதுப்பொலிவுடன் திறந்து வைக்கப்படுகின்றது.

கல்வித்துறை சார்ந்த விடயங்களில் முன்னேறி வருகின்ற மாவட்டமாகவும் முல்லைத்தீவு மாவட்டம் காணப்படுகின்றது. கடந்த காலங்களில் போதிய வசதிகள் இல்லாத நிலையில், வலயக் கல்வித் திணைக்களம் இயங்கி வந்துள்ளது. இருந்தபோதும், முல்லைத்தீவு வலயக்கல்வி திணைக்களம் முன்னின்று தனது சேவையினை செய்துள்ளது.

இதேபோன்று பாடசாலைகளில் அதிபர்கள், ஆசிரியர்கள் தங்குமிட வசதிகள் இல்லாத நிலை காணப்படுகின்றது. அவற்றையும் பூர்த்தி செய்து வழங்கவேண்டிய தேவையுள்ளது என தெரிவித்தார்.