‘இரண்டே வாரங்களில் ரஜினியின் புதுக்கட்சி வரும்’

இன்னும் இரண்டே வாரங்களில், நடிகர் ரஜினிகாந்த், தனது புதிய அரசியல் கட்சி, கொடி, கொள்கைகளை அறிவிப்பார் என்று, காந்திய மக்கள் கட்சித் தலைவர் தமிழருவி மணியன் தெரிவித்துள்ளார்.

பிரபல ஆங்கில செய்திச் அலைவரிசையில், “ரஜினிநேதா (தலைவர் ரஜினி) அரசியல் வருகை” என்ற தலைப்பில், ரஜினிக்கு நெருக்கமான நண்பர்கள், தமிழருவி மணியன் போன்ற தலைவர்களிடம் பேசி, ரஜினியின் அரசியல் வருகையை உறுதி செய்தது. 

இவர்களில், இன்னும் இரண்டு வாரங்களில் இந்தக் கட்சி அறிவிக்கப்பட்டுவிடும் என்றும் ரஜினி கட்சியின் கொள்கைகள் என்னவென்பது குறித்தும் விரிவாக தமிழருவி மணியன் கூறியுள்ளார். 

“இன்னும் 2 வாரங்களில், ரஜினி தனது புதிய கட்சியை தொடங்கி விடுவார். அப்போது, அவர் உறுதி மொழிகளாக சில அறிவிப்புகளையும் வெளியிடுவார். தென்னிந்திய நதிகளை இணைப்பது, ஊழலற்ற வெளிப்படையான ஆட்சியை மக்களுக்கு தருவது ஆகியவை, அவரது உறுதி மொழிகளில் முக்கிய இடம் பிடிக்கும் என்று எதிர்பார்க்கலாம்” என்று அவர் கூறியுள்ளார்.  கட்சியின் பெயரைப் பதிவு செய்யும் வேலைகளை, ஒரு குழு புதுடெல்லியிலிருந்து கவனித்து வருகிறது. ரஜினி கட்சியின் கொள்கை, முன் வைக்கும் மக்களுக்கான திட்டங்கள், ரஜினி மக்களுக்குத் தரும் வாக்குறுதிகளை ஒரு குழு தயாரித்து வருவதாகவும் ரஜினியே நேரடியாக அதை மேற்பார்வை செய்வதாகவும் கூறப்படுகிறது. இரண்டே வாரங்களில், ரஜினி கட்சி அறிவிப்பு உறுதி என்று தமிழருவி மணியன் கூறியிருப்பது பெரும் பரபரப்பை ஏற்படுத்தியுள்ளது.