வலைப்பந்தாட்டத்தில் யாழ். மாவட்ட அணிக்கு சம்பியன்

(கிரிசன்)

வடமாகாண விளையாட்டுத் திணைக்களத்தால் வடமாகாண மாவட்ட அணிகளுக்கிடையே இடம்பெற்ற வலைப்பந்தாட்டப் போட்டியில் யாழ். மாவட்ட அணி சம்பியனாக தெரிவு செய்யப்பட்டுள்ளது.

யாழ்ப்பாணம் துரையப்பா விளையாட்டரங்கில் இடம்பெற்ற இறுதிப் போட்டியில் யாழ். மாவட்ட அணியும் வவுனியா மாவட்ட அணியும் மோதிக்கொண்டன. இரு அணிகளும் ஆரம்பத்தில் சற்று பலமான நிலையில் விளையாடியபோதிலும், தொடர்ந்து யாழ். மாவட்ட அணி முன்னணியில் திகழ்ந்தது.

நான்கு பாதி ஆட்டங்களைக் கொண்ட இந்தப் போட்டியில் முதல் கால்பாதி ஆட்டத்தில் யாழ். மாவட்ட அணி 09க்கு 03 புள்ளிகள் என்ற அடிப்படையிலும் இரண்டாம் கால்பாதி ஆட்டத்தில் 12க்கு 02 என்ற நிலையிலும் மூன்றாம் கால்பாதி ஆட்டத்தில் 09க்கு 01 என்ற நிலையிலும் இறுதி கால்பாதி ஆட்டத்தில் 15க்கு 05 என்ற நிலையிலும் யாழ். மாவட்ட அணி வெற்றி பெற்றது. ஆட்ட நிறைவில் யாழ். மாவட்ட அணி 45க்கு 12 புள்ளிகள் என்ற அடிப்படையில் வெற்றி பெற்று வடமாகாண சம்பியனாக தெரிவானது.