வட மாகாண கிரிக்கெட் வீரர்களை தேசிய ரீதியில் அழைத்துச்செல்ல திட்டம்: மஹேல

(ரொமேஸ் மதுசங்க)

வட மாகாணத்தில் பாடசாலை ரீதியில் கிரிக்கெட் விளையாட்டினை விருத்தி செய்து அதிலிருந்து தெரிவு செய்யப்படும் வீரர்களை தேசிய மட்டத்தில் அழைத்துச் செல்ல நடவடிக்கை எடுக்கப்படும் என்று இலங்கை கிரிக்கெட் அணியின் முன்னாள் தலைவர் மஹேல ஜயவர்தன தெரிவித்தார்.

வவுனியா, கிளிநொச்சி, மன்னார் மற்றும் முல்லைத்தீவு போன்ற மாவட்டங்களிலிருந்து தெரிவு செய்யப்பட்ட 10 பாடசாலைகளுக்கான 300 இலட்சம் ரூபா பெறுமதியான கிரிக்கெட் உபகரணங்களை வழங்கும் நிகழ்வு, நேற்று ஞாயிற்றுக்கிழமை மாலை வவுனியா தமிழ் மகா வித்தியாலயத்தில் இடம்பெற்றது.

இதில் கலந்துகொண்டு மேலும் கருத்து தெரிவித்த அவர், 'கடந்த 30 வருடங்களாக நாட்டில் நிலவிய யுத்தம் தற்போது முடிவுக்கு கொண்டுவரப்பட்டு சமாதானம் மலர்ந்துள்ளது. இந்த தருணத்தில் வட மாகாணத்துக்கான விஜயத்தை மேற்கொள்ள வாய்ப்பு கிடைத்தமையை எண்ணி நான் மகிழ்ச்சியடைகின்றேன்.

இதேவேளை, வட மாகாணத்திலுள்ள இளைஞர்கள் மத்தியில் கிரிக்கெட் விளையாட்டினை ஊக்கப்படுத்தி அவர்களிடையேயான திறமையினை விருத்தி செய்ய நடவடிக்கைகள் எடுக்கப்பட்டு வருகின்றன. அந்தவகையில், பாடசாலைக் காலங்களிலிருந்து இந்த நடவடிக்கை முன்னெடுக்கப்படவுள்ளது' என்றார்.