முஸ்லிம் காங்கிரஸ் சில இடங்களில் ஐ.ம.சு.கூட்டமைப்புடன் இணைந்து போட்டி

(றிப்தி அலி)

எதிர்வரும் உள்ளூராட்சி மன்ற தேர்தலில் ஸ்ரீலங்கா முஸ்லிம் காங்கிரஸ் சில இடங்களில் தனித்தும் வேறு சில இடங்களில் ஐக்கிய மக்கள் சுதந்திர கூட்டமைப்புடன் இணைந்தும் போட்டியிடுவது என இன்று திங்கட்கிழமை இடம்பெற்ற கட்சியின் அதியுயர் பீட மற்றும் அரசியல் பீட கூட்டத்தில் தீர்மானித்ததாக நாடாளுமன்ற உறுப்பினர் எச்.எம்.எம்.ஹரீஸ் தமிழ்மிரர் இணையத்தளத்திற்கு தெரிவித்தார்.

இது தொடர்பில் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமிற்கும் ஐக்கிய மக்கள் சுதந்திர கூட்டமைப்பின் செயலாளர் சுசில் பிரேமஜயந்தவிற்கும் இடையில் இன்று திங்கட்கிழமை இடம்பெற்ற சந்திப்பில் இணக்கம் காணப்பட்டதாக அவர் குறிப்பிட்டார்.

இதேவேளை, வடக்கு கிழக்கிற்கு வெளியில் அக்குறணை பிரதேச சபை தவிர்ந்த ஏனைய உள்ளூராட்சி மன்றங்களில்  ஐக்கிய மக்கள் சுதந்திர கூட்டமைப்புடன் இணைந்து போட்டியிடுவது எனவும் கட்சி தலைவர் ரவூப் ஹக்கீமின் தொகுதியான அக்குறணை பிரதேச சபையில் தனித்து போட்டியிடுவது எனவும் இன்றைய கூட்டத்தில் தீர்மானிக்கப்பட்டதாக நாடாளுமன்ற உறுப்பினர் ஹரீஸ் கூறினார்.

இதேவேளை, வடக்கு கிழக்கு மாகாணத்தில் எந்தெந்த பிரதேசங்களில் தனித்தும் ஐக்கிய மக்கள் சுதந்திர கூட்டமைப்புடன் இணைந்து போட்டியிடுவது என நாளை செவ்வாய்க்கிழமை நடைபெறவுள்ள கூட்டத்தில் தீர்மானிக்கப்படும் என அவர் மேலும் தெரிவித்தார்.