இந்திய - இலங்கை கடற்படைகளுக்கிடையில் செப்டெம்பர் 29 இல் பேச்சுவார்த்தை

(காந்த்ய சேனாநாயக்க)

இலங்கை கடற்படை, இந்திய கடற்படை மற்றும் கரையோர காவற் படையினருக்கிடையில் செப்டெம்பர் 29 ஆம் திகதி நடைபெறும்  கூட்டத்திற்கான நிகழ்ச்சி நிரலில் தமிழக மீனவர்கள் விவகாரமும் அடங்கியிருக்கும் என கடற்படைப் பேச்சாளர் கப்டன் அதுல் செனரத் டெய்லி மிரருக்குத் தெரிவித்தார்.

இந்திய - இலங்கை கடல் எல்லைப் பகுதியில் இந்திய கடற்படைக் கப்பலொன்றில் இச்சந்திப்பு நடைபெறும் எனவும் கப்டன் செனரத் தெரிவித்தார். இலங்கை இந்திய கடற்படைத் தளபதிள் பலர் இதில் கலந்துகொள்ளவுள்ளனர் எனவும் அவர் கூறினார்.
 

இதேவேளை தமிழக மீனவர்கள் மீது இலங்கைக் கடற்படையினர் தாக்குதல் நடத்தியதாக கூறப்படுவது குறித்து ஆராய்வதற்காக இந்திய இலங்கைக் கடற்படையினருக்கிடையில் அவசர சந்திப்பொன்று ஏற்பாடு செய்யப்பட்டுள்ளதாக இந்திய ஊடகங்கள் தெரிவித்துள்ளன.
 

இது தொடர்பாக கப்டன் செனரத்திடம் கேட்டபோது இவ்விவகாரம் குறித்தும் செப்டெம்பர் 29 ஆம் திகதி நடைபெறும் சந்திப்பில் கலந்துரையாடப்படும் என பதிலளித்தார்.