ஏப்ரல் 21 தாக்குதலுக்குப் பின்னரான நிலவரங்கள் தொடர்பில் ஆய்வு

தேசிய பாதுகாப்புக் கற்கைகள் நிலையத்தின் அதிகாரிகளுக்கும் காத்தான்குடி பள்ளிவாசல்கள் முஸ்லிம் நிறுவனங்களின் சம்மேளன பிரதிநிதிகளுக்குமான சந்திப்பொன்று, காத்தான்குடி பள்ளிவாசல்கள் முஸ்லிம் நிறுவனங்களின் சம்மேளனத்தின் அலுவலக மண்டபத்தில், இன்று (17) நடைபெற்றது.

ஏப்ரல் 21 தாக்குதலுக்குப் பின்னரான பாதுகாப்பு நிலைமைகள் தொடர்பிலும் காத்தான்குடி பிரதேசத்தின் நிலவரங்கள் தொடர்பிலும் ஆய்வுவொன்றை மேற்கொள்ளும் நோக்கத்துடன், தேசிய பாதுகாப்புக் கற்கைகள் நிலையத்தின் ஆய்வாளர் கசுனி ரணசிங்க உள்ளிட்ட ஆய்வுக்குழுவினர் இதன்போது காத்தான்குடி பள்ளிவாசல்கள் முஸ்லிம் நிறுவனங்களின் சம்மேளனத்தின் பிரதிநிதிகளைச் சந்தித்துக் கலந்துரையாடினர்.

இக்கலந்துரையாடலில் முஸ்லிம்களின் கலாசாரம், சமய விழுமியங்கள், திருமணச் சட்டங்கள் உள்ளிட்ட நடைமுறை விடயங்கள் தொடர்பாக, தேசிய பாதுகாப்புக் கற்கைகள் நிலையத்தின் அதிகாரி கசுனி ரணசிங்க கேட்டறிந்தார்.

ஆய்வுக் குழுவினரால் முன்வைக்கப்பட்ட சந்தேகங்களுக்கு சம்மேளனத்தின் பிரதிநிதிகளால் விளக்கங்கள் வழங்கப்பட்டன.