வன்னியில் 28 பாடசாலைகளை ‘யுனிசெவ்’ புனரமைக்கவுள்ளது

(பாலமதி)

வன்னியில் யுத்தத்தால் பாதிக்கப்பட்ட நிலையில் இயங்க ஆரம்பித்துள்ள பாடசாலைகளில் 28 பாடசாலைகளை முழுமையாகத் திருத்தி அமைப்பதற்கென ‘யுனிசெவ்’ நிறுவனம் பொறுப்பேற்றுள்ளதாக வடக்கு மாகாணக் கல்விப் பணிப்பாளர் ப.விக்னேஸ்வரன் தெரிவித்துள்ளார்.

ஏனைய பாடசாலைகள் வடக்கின் மீள் எழுச்சித் திட்டம் மற்றும் கல்வி அமைச்சின் நிதியுதவி ஆகியவற்றுடன் திருத்தியமைக்கப்படும் என்று தெரிவித்தார்.

வன்னியில் இடம்பெற்ற யுத்த சூழ்நிலைகள் காரணமாக பாடசாலைகள் பெரிதும் பாதிக்கப்பட்டுள்ளன.

இவற்றில் 28 முன்னிலைப் பாடசாலைகளை முழுமையாகப் புனரமைப்பதற்கு ‘யுனிசெவ்’ நிறுவனம் முன்வந்துள்ளது.

விரைவில் புனரமைப்புப் பணிகள் மேற்கொள்ளப்பட்டு மாணவர்களின் சீரான கல்வி நடவடிக்கைக்கு வழிவகுக்கப்படும் - என்று அவர் மேலும் தெரிவித்தார்.