அலுவலகத்தை இடமாற்ற வேண்டாமென கோரிக்கை

எம்.எஸ்.எம். ஹனீபா

சாய்ந்தமருது பிரதேசத்தில் இயங்கி வரும் தேசிய இளைஞர் சேவைகள் மன்றத்தின்  கிழக்கு மாகாண அலுவலகத்தை, அம்பாறைக்கு இடமாற்ற வேண்டாமென, அகில இலங்கை மக்கள் காங்கிரஸ் கட்சியின் தலைவரும், பாராளுமன்ற உறுப்பினருமான ரிஷாட் பதியுதீன் கோரிக்கை விடுத்துள்ளார்.

இது தொடர்பாக, இளைஞர் விவகார மற்றும் விளையாட்டுத் துறை அமைச்சர் நாமல் ராஜபக்ஷவுக்கு, அவர் நேற்று (23) அனுப்பி வைத்துள்ள கடிதத்தில், சாய்ந்தமருதில் இயங்கி வரும் கிழக்கு மாகாண அலுவலகத்தின் செயற்பாடுகளை தொடர்ந்தும் அதே இடத்தில் இயங்குவதற்கான நடவடிக்கையை மேற்கொள்ளுமாறு குறிப்பிட்டுள்ளது.

அத்துடன், தேசிய இளைஞர் சேவைகள் மன்றத்தின் கிழக்கு மாகாண அலுவலகம், சாய்ந்தமருதிலுள்ள தேசிய இளைஞர் சேவைகள் மன்றத்துக்குச் சொந்தமான கட்டடத்தில் 2011ஆம் ஆண்டு முதல் இயங்கின்றது என அதில் சுட்டிக்காட்டப்பட்டுள்ளது.

இதனை அம்பாறை நகரத்துக்கு இடமாற்றம் செய்வதற்கு பல்வேறு நடவடிக்கைகள் மேற்கொள்ளப்பட்டு வருவதாகவும், அதனை தடுத்து நிறுத்தி, குறித்த அலுவலகம் அவ்விடத்திலையே தொடர்ந்தும் இயங்க நடவடிக்கை எடுக்கவேண்டுமென அக் கடிதத்தில் மேலும் குறிப்பிட்டுள்ளது.