சட்டவிரோதமாக கடத்தப்பட்ட மாடுகள் மீட்பு; இருவர் சந்தேகத்தில் கைது

(ஜவீந்திரா) 

சட்ட விரோதமான முறையில் மாடுகளை ஏற்றிச்சென்ற லொறியொன்றினை மகாஓயா பொலிஸார் நேற்று ஞாயிற்றுக்கிழமை கைப்பற்றியுள்ளனர். மகாஓயா பொலிஸாருக்கு கிடைத்த இரகசிய தகவலின் அடிப்படையில் கட்டாக்காலியாக திரியும் மாடுகளைப் பிடித்து பதுளை மற்றும் நுவரெலியா பிரதேசங்களுக்கு கடத்தி செல்லும் வழியிலேயே இந்த லொறி சோதனையிடப்பட்டுள்ளது.

இதன்போது சுமார் 20 மாடுகள் மிகவும் நெருக்கமான முறையில் மேற்படி லொறியில் அடைக்கப்பட்டிருந்ததாக தெரிவிக்கிப்படுகின்றது. சம்பவத்தின் பொது மேற்படி லொறியின் சாரதியும் உதவியாளரும் கைது செய்யப்பட்டுள்ளனர். இது தொடர்பான மேலதிக விசாரணைகளை மகாஓயா பொலிஸார் மேற்கொண்டு வருகின்றனர்.