விழிப்புணர்வும் எச்சரிக்கையுமே காலத்தின் தேவை

இலங்கையின் பாரம்பரியப் பண்டிகையான தமிழ் - சிங்களப் புத்தாண்டு என்பது மகிழ்ச்சியையும், உறவுகளின் பிணைப்பையும் கொண்டாடும் ஒரு காலமாகும். ஆனால், கடந்த சில தினங்களாக நாட்டின் பல்வேறு பகுதிகளிலிருந்து வெளிவரும் செய்திகள் மிகுந்த கவலையளிக்கின்றன. குறிப்பாக, ஆறுகள், குளங்கள் மற்றும் கடலோரப் பகுதிகளில் நீராடச் சென்றவர்கள் நீரில் மூழ்கி உயிரிழக்கும் சம்பவங்கள் சடுதியாக அதிகரித்துள்ளன. புத்தாண்டு மகிழ்ச்சி பல குடும்பங்களில் ஆறாத் துயரமாக மாறியிருப்பது ஒட்டுமொத்த சமூகத்திற்கும் விடுக்கப்பட்டுள்ள ஓர் எச்சரிக்கையாகும்.

வெப்பமான காலநிலை நிலவும் இக்காலப்பகுதியில், நீர்நிலைகளை நோக்கி மக்கள் படையெடுப்பது இயல்பானது. எனினும், அந்தப் பொழுதுபோக்கு மரணப் பொறிகளாக மாறுவதற்குப் பின்னால் அஜாக்கிரதை மற்றும் பாதுகாப்பு வழிமுறைகளைப் பின்பற்றாமை ஆகியவையே பிரதான காரணங்களாக அமைகின்றன. குறிப்பாக, தங்களுக்குப் பழக்கமில்லாத அல்லது அடையாளம் தெரியாத நீர்நிலைகளில் நீராட முற்படுவது தற்கொலைக்குச் சமமானது.

எதிர்காலத்தில் இத்தகைய விபத்துக்களைத் தவிர்க்கப் பின்வரும் ஆலோசனைகளை மக்கள் மற்றும் அதிகாரிகள் கருத்தில் கொள்ள வேண்டும்:

 ஒருவர் தமக்குத் தெரியாத ஒரு நீர்நிலைக்குச் செல்லும் போது, அதன் ஆழம், நீரோட்டத்தின் வேகம் மற்றும் அடிப்பகுதியின் தன்மை (சகதி அல்லது பாறைகள்) குறித்து உள்ளூர் மக்களிடம் கேட்டுத் தெரிந்துகொள்வது அவசியம்.

  அநேகமான விபத்துக்களுக்குப் போதையில் நீராடுவதே காரணமாக அமைகின்றது. மதுபோதையில் இருக்கும்போது ஒருவரின் தீர்மானம் எடுக்கும் திறன் மற்றும் உடல் இயக்கம் மந்தமடைவதால், சிறிய நீரோட்டத்தைக் கூட சமாளிக்க முடியாமல் உயிரிழப்புகள் நேரிடுகின்றன.

  அனர்த்த முகாமைத்துவப் பிரிவினரால் 'ஆபத்தான பகுதி' என அடையாளப்படுத்தப்பட்ட இடங்களில் எக்காரணம் கொண்டும் நீராடக் கூடாது. சட்டத்தை விடவும் தற்காப்பு உணர்வே ஒருவரைப் பாதுகாக்கும்.

  சிறுவர்கள் நீர்நிலைகளுக்கு அருகில் இருக்கும்போது பெரியவர்கள் எப்போதும் விழிப்புடன் இருக்க வேண்டும். சில விநாடிக் கவனச்சிதறல் கூட ஈடுசெய்ய முடியாத இழப்பை ஏற்படுத்திவிடும்.

 பொது இடங்களில் பாதுகாப்பான நீராடல் வலயங்களை   உருவாக்குவதும், உயிர்காப்புப் பிரிவினரை  அமர்த்துவதும் உள்ளூர் அதிகாரிகளின் கடமையாகும். அத்துடன், முதலுதவி மற்றும் உயிர்காப்பு உத்திகள் குறித்து பொதுமக்களுக்குக் கிராமிய மட்டத்தில் பயிற்சிகளை வழங்க வேண்டும்.

நீர் என்பது வாழ்வாதாரம், அது உயிரைப் பறிக்கும் ஆயுதமாக மாறாமல் பார்த்துக்கொள்ள வேண்டியது நம் ஒவ்வொருவரின் பொறுப்பாகும். 'வருமுன் காப்பதே சிறந்தது' என்ற முதுமொழிக்கு ஏற்ப, கொண்டாட்டங்களின் போது கட்டுப்பாட்டையும் பாதுகாப்பையும் கடைப்பிடித்தல் அவசியமாகும்.