வட மாகாண வல்லவன் தொடர்: சுப்பர் 8இல் குருநகர் பாடுமீன்

பருத்தித்துறை கால்பந்தாட்ட லீக்கின் அனுமதியுடன், வல்வெட்டித்துறை நெற்கொழு கழுகுகள் விளையாட்டுக் கழகம், தனது மைதானத்தில் நடாத்தி வரும் இவ்வருடத்துக்கான வட மாகாண வல்லவன் தொடரின் சுப்பர் 8 சுற்றுக்கு இரண்டாவது அணியாக குருநகர் பாடுமீன் விளையாட்டுக் கழகம் தகுதி பெற்றுள்ளது.

பாடுமீன் விளையாட்டுக் கழகத்துக்கும் வல்வெட்டித்துறை ஆதிசக்தி விளையாட்டுக் கழகத்துக்குமிடையிலான நான்காவது சுற்றுப் போட்டியொன்றில் வெற்றி பெற்றே, பாடுமீன் விளையாட்டுக் கழகம், சுப்பர் 8 சுற்றுக்குத் தகுதி பெற்றுள்ளது.

குறித்த போட்டியின் இரண்டு அணிகளதும் கோல் போடும் வாய்ப்புகள், எதிரெதிர் அணிகளது பின்கள வீரர்களின் சாதுர்யமான ஆட்டத்தால் தடுக்கப்பட, ஆட்டநேர முடிவில் இரண்டு அணிகளும் கோலெதனையும் பெற்றிருக்கவில்லை. இதனையடுத்து, சுப்பர் 8 சுற்றுக்கு தெரிவாகும் அணியைத் தேர்வு செய்யும் பொருட்டு வழங்கப்பட்ட பெனால்டியில், 3-1 என்ற ரீதியில் வெற்றி பெற்ற பாடுமீன் விளையாட்டுக் கழகம், சுப்பர் 8 சுற்றில் தனது இடத்தைப் பதிவு செய்து கொண்டது.

இதேவேளை, மன்னார் சென். லூசியஸ் விளையாட்டுக் கழகத்துக்கும் முல்லைத்தீவு சென். லூட்ஸ் விளையாட்டுக் கழகத்துக்குமிடையிலான மூன்றாவது சுற்றுப் போட்டியொன்றில், 2-1 என்ற கோல்கணக்கில் வெற்றி பெற்ற சென். லூசியஸ் விளையாட்டுக் கழகம், நான்காவது சுற்றுக்குத் தகுதி பெற்றது. சென். லூசியஸ் அணி சார்பாக எடிசன், பிராங்ளின் ஆகியோர் கோல்களைப் பெற்றிருந்ததோடு, சென். லூட்ஸ் சார்பாக பெறப்பட்ட கோலை ஸ்ரீ பெற்றிருந்தார்.