கோமரங்கடவெல தவிசாளர் திடீர் மரணம்

எஸ்.கீதபொன்கலன்

தேசிய மக்கள் சக்தியின் ஆட்சியில் உள்ள கோமரங்கடவெல பிரதேச சபையின் தவிசாளர் ரங்கிக்க தர்மதாஸ( வயது 33) வௌ்ளிக்கிழமை (21) அன்று அதிகாலை திடீர் மரணமடைந்துள்ளார்.

தமது வயலில் காவல் காப்பதற்கு வியாழக்கிழமை (20)  இரவு வீட்டில் இருந்து சென்றிருந்த இவர் வயல் வாடியில் உணர்விழந்த நிலையில் காணப்பட்டார்.இவரது மரணத்திற்கு காரணம் எதுவென இது வரை தெரியவரவில்லை.

இவர் தனது வயல் காவலுக்காக இரவுகளில் வயலுக்கு செல்வது வழமை என்றும்,ஆனால், தினமும்  காலையில்   இவர் வீடு திரும்புவார்.ஆனால் வெள்ளிக்கிழமை (21) காலை 8 மணி ஆனபோதும் வீடு திரும்பவில்லை.இதனால் இவரது உறவினர் ஒருவர் வயலுக்கு சென்று பார்வையிட்ட போது அவர் உணர்விழந்த நிலையில் காணப்பட்டதால் அவரை அயலவர்களின் உதவியுடன் கோமரங்கடவெல வைத்தியசாலைக்கு கொண்டு சென்றதாகவும்,அங்கு அவர் மரணமடைந்து விட்டார் என மருத்துவர்கள் தெரிவித்துள்ளனர்.

இதனை அடுத்து இவரது மரணம் தீடீர் என ஏற்பட்டுள்ளது என்பதால் மரண விசாரணையை நடத்த வேண்டும் என பொலிஸார் கூறினர்.

அதன்படி சடலம் திருகோணமலை மாவட்ட பொது வைத்தியசாலைக்கு எடுத்து வரப்பட்டு திடீர் மரண விசாரணை அதிகாரி மொகமட் சுபைர் சாபியினால் மரண விசாரணை நடைபெற்றது.

இதனை அடுத்து மரண விசாரணை அதிகாரியின் உத்தரவிற்கிணங்க சட்ட வைத்திய அதிகாரியினால் பிரதேச பரிசோதனை நடத்தப்பட்டது.தொடர்ந்து சடலத்தில் இருந்து பெறப்பட்ட மாதிரிகள் கொழும்பு  பிரதம சட்ட வைத்திய பிரிவிற்கு அனுப்பப்பட்டுள்ளது.அங்கிருந்து அறிக்கை கிடைத்த பின்னரே மரணத்திற்காக காரணம் தெரியவரும் என மரண விசாரணை அதிகாரி கூறினார்.

மேலதிக விசாரணைகளை கோமரங்கடவெல பொலிஸார் மேற்கொண்டு வருகின்றனர். 

இதே வேளை மரணமடைந்தவருக்கு கடந்த 8 வருடங்களாக இருதய நோய் இருந்து வருவதாகவும்,அதற்காக அவர் தொடர்ந்து சிகிச்சைகள் பெற்று வருவதாகவும் மரண விசாரணையின் போது அவரது உறவினர்கள் கூறினர்.