வழக்கத்துக்கு மாறாக மக்களை வாட்டி வதைக்கும் வெப்பம்

-ஜே.ஏ.ஜோர்ஜ்

இலங்கையில் வழமையாக ஏப்ரல் மாதம் அதிக வெப்பமாக இருக்கும். ஆனால் வழமைக்கு மாறாக இம்முறை வருடத்தின் ஆரம்பத்திலேயே இலங்கையின் பல பகுதிகளில் அதிக வெப்பம் ஏற்பட்டுள்ளதுடன், இது நாட்டில் வறட்சிக்கு வித்திட்டுள்ளது. 

கொழும்பு உள்ளிட்ட பகுதிகளில் நிலவும் அதிக வெப்பநிலை மக்களை அசௌகரியமாக்குவதுடன், வளிமண்டலவியல் திணைக்களம் பல மாவட்டங்களுக்கு அதிகூடிய வெப்ப எச்சரிக்கைகளை வெளியிடும் நிலைக்கு கொண்டு சென்றுள்ளது.

மனித உடலுக்கு தீங்கு விளைவிக்கும் வகையிலான சுகாதார தாக்கங்களை ஏற்படுத்தக்கூடிய அதிக வெப்பம் தொடர்பில் நாட்டு மக்களுக்கு எச்சரிக்கையும் விடுக்கப்பட்டுள்ளது.

இலங்கைக்கு அண்மித்த தெற்காசிய நாடுகள் கடுமையான வெப்ப அலையால் பாதிக்கப்பட்டுள்ளதால், வழக்கத்திற்கு மாறாக அதிக வெப்பநிலை இலங்கை மக்களையும் அவர்களின் அன்றாட வாழ்க்கையையும் பாதித்து உள்ளது.

இவ்வாறான காலநிலை ஆபத்து குறித்து உள்ளூர் மக்கள் தமது கவலையை வெளிப்படுத்தி வருகின்றனர். தற்போதைய அதிக வெப்பநிலையானது, அலுவலகம் மற்றும் மூடப்பட்ட பகுதிகளில் வேலை செய்வோரை விட, வயல் வெளி மற்றும் திறந்த வெளிகளில் வேலை செய்வோரை கடுமையான முறையில் பாதிக்கின்றது.

கொழும்பு புறக்கோட்டை பகுதியில் வீதியோரத்தில் வியாபாரம் செய்து வரும் சுமன் என்பவர், இந்த அதீத வெப்பமானது தன்னையும் தனது வியாபாரத்தையும் பாதித்து உள்ளதாக கூறுகின்றார்.

தற்போது, "வெப்பநிலை சுமார் 36 டிகிரி செல்சியஸ் வரை உயர்ந்துள்ளதால், அண்மைய வெப்ப அழுத்த காலத்தில் இலங்கை தினசரி அதிகபட்ச வெப்பநிலையை விட சுமார் 3 டிகிரி செல்சியஸ் அதிகரிப்பை சந்தித்துள்ளது" என்று துணைவேந்தர் ஷிரோமணி ஜெயவர்தன கூறுகிறார். 

அதிக வெப்பமானது உடலுக்குக்கும் மனதுக்கும் அழுத்தத்தை ஏற்படுத்தும் என்றும் அதிக நீரிழப்பால் உயிரிழப்புகூட ஏற்படலாம் என்றும், எனவே  தாம் விடுக்கும் எச்சரிக்கைகளை பின்பற்றுமாறு வளிமண்டலவியல் திணைக்களம் அறிவுறுத்தியுள்ளது.

இலங்கையின் பாடசாலை புதிய தவணைகள் ஆரம்பித்துள்ள நிலையில், நாட்டில் நிலவும் அதிக வெப்பநிலை காரணமாக ஏற்படக்கூடிய பாதிப்புகளில் இருந்து விடுபடுவதற்காக பாடசாலை மாணவர்களுக்கு தொடர் அறிவுறுத்தல்களை கல்வி அமைச்சு வெளியிட்டுள்ளது.

இதுபோன்ற வெப்பமான நாட்களில் பாடசாலை இல்ல விளையாட்டு போட்டிகள் மற்றும் உடற் பயிற்சிகளை தவிர்க்க வேண்டும் எனவும் சுகாதார அமைச்சின் வழிகாட்டுதலின்படி வழங்கப்பட்டுள்ள அறிவுறுத்தல்களை கடைபிடிக்கவேண்டும் எனவும் அறிவிக்கப்பட்டுள்ளது.

 “வெப்பமான நாட்களில் மாணவர்கள் வெளிப்புற / விளையாட்டு மைதான நடவடிக்கைகளைத் தவிர்க்க வேண்டும் என்பதுடன், மாணவர்கள் அதிக சூரிய ஒளியுடன் வெளியில் நேரத்தை செலவிடுவதையும், ஓய்வு நேரத்தில் வெளியில் திரிவதையும் தவிர்க்க வேண்டும். அத்துடன், சோர்வைப் போக்க அதிக தண்ணீர் குடிப்பதும், குறுகிய கால ஓய்வு எடுத்துக் கொள்வதும் சிறந்தது” என்று கல்வியமைச்சு வெளியிட்டுள்ள அறிக்கையில் தெரிவிக்கப்பட்டுள்ளது.

வெப்பமான மதிய நேரங்களில் மாணவர்கள் தேவையில்லாமல் வெளியே செல்வதை தவிர்ப்பதுடன், அதிக வெப்பம் உள்ள சூழலில் தலையை நன்றாக மறைக்கும் தொப்பி அல்லது குடையைப் பயன்படுத்துமாறும், கருப்பு நிற ஆடைகளை அணியக்கூடாது என்றும் அறிவுறுத்தப்பட்டுள்ளது. 

கடந்த வருடம் 40 டிகிரி செல்சியஸுக்கு மேல் அதிக வெப்பநிலையுடன் கூடிய அசாதாரண வெப்ப அலையானது தெற்கு மற்றும் மத்திய ஆசியாவில் தாக்கத்தை ஏற்படுத்தியது. இலங்கை ஒரு தீவு என்பதால், அது அண்டை நாடுகளைப் போன்ற தாக்கங்களை ஏற்படுத்தவில்லை.

ஆனால் காலநிலை மாதிரிகள் 2030 க்குப் பிறகு இதேபோன்ற வெப்ப அலைகளின் அபாயங்களை முன்வைக்கின்றன, ஜெயவர்தன கூறினார்.

அதிகரித்த வெப்ப அழுத்தமானது காலநிலை மாற்றத்திற்கான அறிகுறியாகும், மேலும் 1.5 டிகிரி செல்சியஸ் புவி வெப்பமடைதலுடன் கூட தெற்காசியா முழுவதும் கொடிய வெப்ப அழுத்தம் ஒரு பொதுவான நிகழ்வாக மாறுகிறது என்று அண்மைய ஆய்வுகளில் தெரியவந்துள்ளது.

சுற்றுச்சூழல், காலநிலை மற்றும் தொழில்நுட்பத்திற்கான அறக்கட்டளையின் (FECT) விஞ்ஞானி Lareef Zubair, காலநிலை மாற்றம் காரணமாக இலங்கையில் வெப்ப அழுத்தமானது, சனத்தொகையில் பெரும் பகுதியினருக்கு ஆபத்தான நிலைக்கு உயர்ந்து வருவதாக தெரிவித்தார்.

இலங்கையர்கள் இப்போது அதிக வெப்பமான இரவுகளை அனுபவித்து வருகின்றனர். ஆண்டுதோறும் சராசரியாக குறைந்தபட்ச வெப்பநிலை அதிகரித்து, அதிகபட்ச மற்றும் குறைந்தபட்ச வெப்பநிலைகளுக்கு இடையிலான இடைவெளியைக் குறைக்கிறது என்று ஒரு ஆய்வில் தெரியவந்துள்ளது.

ஒரு தசாப்தத்திற்கு 1.8 டிகிரி செல்சியஸ் என்ற அளவில் உலக சராசரியை விட இலங்கையில் வெப்பநிலை வேகமாக அதிகரித்து வருகிறது.

2019, 2020 மற்றும் 2022 ஆம் ஆண்டுகளில், வெப்ப அழுத்தம் ஆபத்து நிலைகளை அடைந்தது, குறிப்பாக ஏப்ரல் முதல் ஜூன் வரை இலங்கையின் குறைந்த உயரமான பகுதிகளில் இது வெப்பமயமாதல் வெப்பநிலையின் பங்கின் தெளிவான அறிகுறியாக காணப்படுவதாக காலநிலை விஞ்ஞானிகள் தெரிவிக்கின்றனர்.

அண்மைய வாரங்களில் அதிகரித்துள்ள வெப்ப அழுத்தத்தின் காரணமாக 2024 ஆம் ஆண்டின் பெப்ரவரி மாதத்தில் பல நாட்கள் "அதிக எச்சரிக்கை" கொண்ட நாட்களாக குறிக்கப்பட்டுள்ளன. 

நகரமயமாக்கப்பட்ட பகுதிகள் அதிக வெப்பத்திற்கு ஆளாகின்றன, இதில் மனித நடவடிக்கைகள் நகர்ப்புற சூழலை கிராமப்புறங்களை விட கணிசமாக வெப்பமாக்குகின்றன என்று கொழும்பு பல்கலைக்கழகத்தின் சுற்றுச்சூழல் அறிவியல் பேராசிரியர் எரந்ததி லொகுபிட்டிய தெரிவித்துள்ளார்.

 "நகர்ப்புற அமைப்பில், கட்டிடங்கள், தார் சாலைகள் மற்றும் சிமென்ட் செய்யப்பட்ட நடைபாதைகள் உள்ளன, அவை வெப்பத்தை உறிஞ்சி பின்னர் அவற்றை வெளியிடுகின்றன," என்று அவர் சுட்டிக்காட்டினார்.

இதேவேளை, இலங்கையின் வர்த்தகத் தலைநகரான கொழும்பில் வெப்பம் காலப்போக்கில் உயர்ந்து வருவதையும் ஆய்வுகள் காட்டுகின்றன.

காலநிலை மாற்றத்தின் இந்த சகாப்தத்தில், வெப்ப அழுத்தங்களால் வெளிப்படும் அதிகரித்து வரும் அச்சுறுத்தல்களைத் தணிக்க நகரங்கள் மூலோபாய ரீதியாக வடிவமைக்கப்பட வேண்டும் என்று மொரட்டுவ பல்கலைக்கழகத்தின் நகர திட்டமிடல் நிபுணர் ஜகத் முனசிங்க தெரிவித்தார். 

"நகர்ப்புற சூழலை இயற்கையாகவே குளிர்விக்கவும், இயற்கையான காற்றின் மூலம் வெப்பத்தை குறைக்கவும் உதவும் காற்று தாழ்வாரங்கள் உள்ளன. கொழும்பு ஒரு கரையோர நகரம், எனவே கவனமாக திட்டமிடப்பட்டால் வலுவான காற்று சுரங்கங்களை உருவாக்க உதவும் கடல் காற்று உள்ளது, ” என்று அவர் குறிப்பிடுகின்றார்.

தாவரங்கள் இயற்கையின் காற்று சுத்திகரிப்பாளர்கள், ஏனெனில் அவற்றின் ஆவியாதல் வளிமண்டலத்தில் நீராவி சேர்க்கிறது. ஆனால் நகர்ப்புறங்கள் விரைவாக பசுமையை இழந்து வருகின்றன, இதனால் அவை ஆரோக்கியமற்றதாகவும் வாழ்வதற்கு வசதியற்றதாகவும் ஆக்குகின்றன, எனவே நகரங்களை மீண்டும் பசுமையாக்குவதற்கு முன்னுரிமை அளிக்கப்பட வேண்டும் என்று முனசிங்க சுட்டிக்காட்டினார்.

மனிதர்கள் மட்டுமல்லாது விலங்குகள், தாவரங்கள் மற்றும் சுற்றுச்சூழல் அமைப்புகளும் அதிகரித்த வெப்ப அழுத்தத்தின் காரணமாக தவிர்க்க முடியாத தாக்கங்களை அனுபவித்து வருகின்றமை குறிப்பிடத்தக்கதாகும்.