’’கண்டது ஆவியல்ல... கூலிங் கிளாஸ் ஆசாமி ’’

"பஸ்ஸில் ஏறிய பயணியைக் காணவில்லை... சீட்டில் இருப்பதோ யாரோ ஒரு புதிய நபர்! நடத்துநரே பயந்துபோய் 'தான் கண்டது ஆவியோ' என்று நடுங்கிய சம்பவம் தெற்கு மாகாணத்தில் அரங்கேறியுள்ளது. அந்த நபர் பயன்படுத்திய அந்த 'அபூர்வ தந்திரம்' இப்போது சிரிப்பலையை ஏற்படுத்தியுள்ளது..."

பார்ப்பதற்கு மிகவும் நாகரிகமான உடையணிந்திருக்கும் இவரிடம், செலவு செய்ய ஒரு சதம்கூட இருக்காது என்பதுதான் வேடிக்கை. பேச்சு என்னவோ பல்லக்கில்தான் இருக்கும், ஆனால் பயணம் பெரும்பாலும் கால்நடையாகவே அமையும். இதுதான் இவரின் இயல்பு. குறிப்பாக, இவர் பஸ்ஸில் பயணித்தால் நடத்துநரின் கண்ணில் மண்ணைத் தூவிவிட்டு, டிக்கெட் எடுக்காமல் திருட்டுத்தனமாகப் பயணிப்பதையே வழக்கமாகக் கொண்டுள்ளார். ஒருவேளை இவர் டிக்கெட் எடுத்துப் பயணம் செய்கிறார் என்றால், "அன்று சூரியன் மேற்கில் உதிக்கிறது" என்றுதான் அர்த்தம் என இவரைப் பற்றி அறிந்தவர்கள் கூறுகின்றனர். தனது மனைவியுடன் சென்றால்கூட அவர் இதே பாணியைத்தான் கடைப்பிடிப்பாராம்.

அண்மையில் இவர் சனநெரிசல் இல்லாத ஒரு பஸ்ஸில் ஏறி, அதன் பின்பக்கக் கதவூடாக உள்ளே நுழைந்துள்ளார். பஸ்ஸில் ஏறிய புதிய பயணியைத் தேடி டிக்கெட் கொடுப்பதற்காக நடத்துநர் அங்குமிங்கும் நோட்டமிட்டுள்ளார். ஆனால், பஸ்ஸில் ஏறிய நபரைக் காணவில்லை. எனினும், குறிப்பிட்ட அந்த ஆசாமி பஸ்ஸினுள்ளேதான் அமர்ந்திருந்தார்.

நடத்துநர் பெரும் குழப்பத்தில் ஆழ்ந்துவிட்டார். "பஸ்ஸில் ஏறியவர் எங்கே மறைந்தார்?" எனத் தெரியாமல் திகைத்த அவர், தான் கண்டது ஒருவேளை 'ஆவியாக' (Ghost) இருக்குமோ என்று எண்ணி பயந்துபோயுள்ளார்.

  உண்மையில் அங்கே நடந்தது என்னவென்றால், அந்த நபர் பஸ்ஸினுள் அமர்ந்து அரைத்தூக்கத்தில் இருப்பது போலப் பாசாங்கு செய்துகொண்டிருந்தார். ஏதோ நீண்ட நேரத்திற்கு முன்னரே பஸ்ஸில் ஏறிய ஒரு பயணியைப் போல அவர் பவ்வியமாக அமர்ந்திருந்தார். பஸ்ஸில் ஏறும்போது அவர் கண்ணாடி அணிந்திருக்கவில்லை. ஆனால், உள்ளே சென்றதும் கண்களை மறைக்கும் வகையில் பெரிய கூலிங் கிளாஸ் (Sunglasses) ஒன்றை அணிந்துகொண்டார்.

கண்ணாடி அணியாமல் ஏறிய பயணியையே நடத்துநர் தேடியுள்ளார். ஆனால், அங்கே கண்ணாடி அணிந்த ஒருவர் மட்டுமே இருந்ததால், நடத்துநரால் அவரை அடையாளம் காண முடியாமல் போனது. மீண்டும் மீண்டும் தேடியும் அந்தப் பயணியைக் காணாததால், நடத்துநர் தான் ஏற்றியது ஒரு ஆவியைத் தானோ என்று உண்மையாகவே அச்சமடைந்துள்ளார்.

  இறுதியாகத் தனது இலக்கை அடைந்ததும், அந்த நபர் பஸ்ஸிலிருந்து லாவகமாக இறங்கி, தனது கூலிங் கிளாஸைக் கழற்றிப் பையினுள் போட்டுக்கொண்டார். பின்னர் தனது அலுவலகத்திற்குச் சென்று, அன்று பஸ்ஸில் டிக்கெட் எடுக்காமல் வருவதற்காகத் தான் பயன்படுத்திய அந்த 'அபூர்வ தந்திரம்' குறித்துத் தனது நண்பர்களிடம் பெருமையாகப் பேசி மகிழ்ந்துள்ளார்.