'கெஹல்பத்தர பத்மே' மீதான பிடி இறுகுகிறது: லும் 90 நாட்கள் CID வசம்!’’

  கொழும்பு நீதவான் நீதிமன்றக் கூண்டுக்குள் வைத்து, பாதாள உலகக் குழுத் தலைவர் 'கனேமுல்ல சஞ்சீவ'வைச் சுட்டுக் கொலை செய்ய முயன்ற சம்பவத்தின் முக்கிய சந்தேக நபரான 'கெசல்பெத்தர பத்மே' என்பவரை மேலும் 90 நாட்கள் தடுத்து வைத்து விசாரணை செய்ய நீதிமன்றம் அனுமதி வழங்கியுள்ளது.

நீதிமன்ற உத்தரவு

குற்றப்புலனாய்வுத் திணைக்களம் (CID) முன்வைத்த கோரிக்கையை ஆராய்ந்த கொழும்பு பிரதான நீதவான் அசங்க போதரகம, கடந்த திங்கட்கிழமை (05) இந்த உத்தரவைப் பிறப்பித்தார்.

வழக்கின் பின்னணி மற்றும் விசாரணை நிலவரம்:

• தடுப்புக்காவல் நீடிப்பு: சந்தேக நபரான கெசல்பெத்தர பத்மேவிடம் ஏற்கனவே 90 நாட்கள் விசாரணை நடத்தப்பட்டுள்ளது. தற்போது, கடந்த பெப்ரவரி மாதம் 26 ஆம் திகதி முதல் நடைமுறைக்கு வரும் வகையில், மேலும் 90 நாட்களுக்கு அவரைத் தடுத்து வைத்து விசாரிக்க பாதுகாப்பு அமைச்சு அனுமதி வழங்கியுள்ளதாக CID பொலிஸார் மன்றுக்குத் தெரிவித்தனர்.
• முக்கிய குற்றச்சாட்டு: நீதிமன்றக் கூண்டிற்குள் கனேமுல்ல சஞ்சீவவை இலக்கு வைத்து நடத்தப்பட்ட கொலை முயற்சிச் சம்பவத்தில், தாக்குதல்தாரிகளுக்கு உதவியமை மற்றும் சதித் திட்டத்தில் ஈடுபட்டமை ஆகிய குற்றச்சாட்டுகள் இவர் மீது சுமத்தப்பட்டுள்ளன.
• தொடர்புடைய ஏனையோர்: இக்கொலை முயற்சிக்கு உடந்தையாக இருந்ததாகக் கூறி, ஏற்கனவே விளக்கமறியலில் வைக்கப்பட்டுள்ள கம்பஹா குற்றப் புலனாய்வுப் பிரிவின் முன்னாள் உப பொலிஸ் பரிசோதகர் நிரோஷன் உதித் உதயசாந்த என்பவருக்கு எதிரான வழக்கு விசாரணைக்கு எடுத்துக்கொள்ளப்பட்ட போதே இந்த அறிக்கைகள் சமர்ப்பிக்கப்பட்டன.

மேலதிக விசாரணைகள்

இச்சம்பவம் தொடர்பான விசாரணைகள் மிகவும் நுணுக்கமான முறையில் தொடர்ச்சியாக இடம்பெற்று வருவதாகவும், சந்தேக நபரிடமிருந்து மேலதிக வாக்குமூலங்களைப் பெற வேண்டியுள்ளதாகவும் குற்றப்புலனாய்வுத் திணைக்களம் நீதிமன்றத்தில் சுட்டிக்காட்டியுள்ளது.