”நான் கலந்துரையாடலில் பங்கேற்கவில்லை”

சர்வஜன பலய கட்சியின் தலைவரும், பாராளுமன்ற உறுப்பினருமான திலித் ஜெயவீர, ஐக்கிய தேசியக் கட்சியிடம் (UNP) தனது பெயரைக் குறிப்பிட்டு வெளியிட்ட அறிக்கையை திருத்துமாறு கேட்டுக் கொண்டுள்ளதாகவும், சமீபத்திய சந்திப்பின் போது தொலைபேசி மூலம் தன்னைத் தொடர்பு கொண்டதாகக் கூறப்படும் கூற்று தவறானது என்றும் கூறினார். 

சமூக ஊடகத்தில் அறிக்கை ஒன்றை வெளியிட்ட பாராளுமன்ற உறுப்பினர் ஜெயவீர, ஐக்கிய தேசியக் கட்சியின் தலைவரும் முன்னாள் ஜனாதிபதியுமான ரணில் விக்கிரமசிங்க தலைமையில் மேலும் பல எதிர்க்கட்சிகளுடன் இணைந்து நடாத்தப்பட்ட கூட்டத்தில் தான் (திலித்) தொலைபேசி மூலம் பங்கேற்றதாக ஐக்கிய தேசியக் கட்சி கூறியுள்ளதாக கூறினார்.

தேசிய மக்கள் சக்தி (NPP) பெரும்பான்மையைப் பெறத் தவறிய நகராட்சி மன்றங்கள், நகர சபைகள் மற்றும் பிரதேச சபைகள் உட்பட அனைத்து உள்ளூராட்சி நிறுவனங்களிலும் அதிகாரத்தை நிறுவுவது குறித்து விவாதிக்க UNP தலைமையிலான கூட்டம் நடைபெற்றது.

கூட்டத்தின் விவரங்களை வழங்கி, கலந்துரையாடலில் பங்கேற்ற அனைத்து எதிர்க்கட்சிகள் மற்றும் அவற்றின் உறுப்பினர்களை ஐக்கிய தேசியக் கட்சி கோடிட்டுக் காட்டியதுடன், சர்வஜன பலய தலைவர் திலித் ஜெயவீர தொலைபேசி அழைப்பு மூலம் இணைந்ததாகவும் கூறியது.

இந்தக் கூற்றை மறுத்து, பாராளுமன்ற உறுப்பினர் திலித் ஜெயவீர, அந்தக் கூற்று தவறானது என்றும், இதை உடனடியாக சரிசெய்யுமாறு ஐக்கிய தேசியக் கட்சித் தவிசாளர் வஜிர அபேவர்தனவிடம் கோரிக்கை விடுத்துள்ளதாகவும், அதற்கு அவர் நடவடிக்கை எடுக்க ஒப்புக்கொண்டதாகவும் கூறினார்.