மணல் ஏற்றிய மூவர் கைது

-எப்.முபாரக்                    

திருகோணமலை, சேருவில பொலிஸ் பிரிவுக்குட்பட்ட கங்கைப் பகுதியில் அனுமதிப்பத்திரமின்றி மணல் ஏற்றியதாகக் கூறப்படும் மூன்று பேரை இன்று புதன்கிழமை காலை பொலிஸார் கைதுசெய்துள்ளதுடன், மூன்று உழவு இயந்திரங்களையும் கைப்பற்றியுள்ளனர்.

மணல் ஏற்றியமை தொடர்பில் தமக்குக் கிடைத்த தகவலைத் தொடர்ந்து, குறித்த பகுதிக்குச் சென்று சுற்றிவளைப்பு மேற்கொண்டே இந்தச் சந்தேக நபர்களைக் கைதுசெய்துள்ளதாக பொலிஸார் தெரிவித்தனர்.

மேலும், பொலிஸார் வருவதைக் கண்ட சந்தேக நபர்கள் மணல் ஏற்றப்பட்ட உழவு இயந்திரத்தை அவசரமாக செலுத்த முற்பட்டபோது, உழவு இயந்திரம் ஒன்று கவிழ்ந்து கங்கைக்குள் விழுந்துள்ளது.

இதன்போது, இரண்டு சந்தேக நபர்கள் அங்கிருந்து தப்பியோடியுள்ளதாகவும் பொலிஸார் கூறினர்.
கைதுசெய்யப்பட்ட சந்தேக நபர்களிடம் பொலிஸார் விசாரணைகளை மேற்கொண்டு வருகின்றனர்.