சீனக்குடா மீன்பிடி துறைமுக பகுதியிலிருந்து ஆணின் சடலம் மீட்பு

(அப்துல்சலாம் யாசிம்)

திருகோணமலை சீனக்குடா  மீன்பிடி துறைமுக பகுதியிலிருந்து  ஆணொருவரின்  சடலம்  நேற்று செவ்வாய்க்கிழமை இரவு 11.30 மணியளவில் மீட்கப்பட்டுள்ளது.

இல.- 6 5 தியவர கம்மானய, இறனவில, அம்பகந்தவில பகுதியைச் சேர்ந்த இரண்டு பிள்ளைகளின் தந்தையான கந்தன வாமராஐக் (வயது 33) என இவர் அடையாளம் காணப்பட்டுள்ளார்.

சடலமாக மீட்கப்பட்டவர் மீன்பிடி தொழிலுக்காக திருகோணமலைக்கு வந்தவரென்றும் தனது நண்பர்களுடன் இரவுச் சாப்பாட்டை முடித்த  பின்னர் வெளியே சென்ற அவர் கடலில் தவறி வீழ்ந்து உயிரிழந்ததாக வைத்தியசாலை அதிகாரியிடம், நண்பர் தெரிவித்தார்.  

இவரது சடலம் பிரேத பரிசோதனைக்காக திருகோணமலை அரசினர் பொதுவைத்தியசாலையில் வைக்கப்பட்டுள்ளது. இச்சம்பவம் தொடர்பில் தானியகம பொலிஸார் விசாரணைகளை மேற்கொண்டு வருகின்றனர்.