வீரர்களின் சங்கத்தில் ஸ்டார்க் நம்பிக்கை

அவுஸ்திரேலிய கிரிக்கெட் சபைக்கும் அதன் வீரர்களுக்குமிடையில், ஊதிய ஒப்பந்தம் தொடர்பான முறுகல் நிலையில், தமது நிலைப்பாட்டை வீரர்கள் மாற்றவில்லையெனத் தெரிவித்துள்ள வேகப்பந்து வீச்சாளர் மிற்சல் ஸ்டார்க், இந்தப் பேரம்பேசல்களில், கிரிக்கெட் சபையோடு பேசுவதற்கு, அவுஸ்திரேலிய கிரிக்கெட் வீரர்களின் சங்கத்தையே தொடர்ந்தும் நம்பிக்கை கொண்டிருப்பதாகத் தெரிவித்துள்ளார்.

வீரர்களின் சங்கத்தைத் தாண்டி, வீரர்களோடு நேரடியாகப் பேச்சுவார்த்தைகளில் ஈடுபடுவதற்கு, கிரிக்கெட் சபை முயன்றுவரும் நிலையிலேயே, ஸ்டார்க்கின் இந்தக் கருத்து வெளியாகியுள்ளது.

தாங்கள், நியாயமான பங்கையே கேட்பதாகத் தெரிவித்த ஸ்டார்க், அதிகமானதைத் தாங்கள் கேட்கவில்லையெனவும் குறிப்பிட்டார்.