ஈக்குவடோரிடம் படுதோல்வியடைந்த கொலம்பியா

சர்வதேச கால்பந்தாட்ட சம்மேளன உலகக் கிண்ணத் தொடருக்கான தென்னமெரிக்க கால்பந்தாட்ட சம்மேளன தகுதிகாண் போட்டிகளில், ஈக்குவடோரில் இன்று அதிகாலை நடைபெற்ற கொலம்பியா, ஈக்குவடோருக்கிடையிலான போட்டியில் 1-6 என்ற கோல் கணக்கில் கொலம்பியா தோற்றது.

கொலம்பியா சார்பாகப் பெறப்பட்ட கோலை ஜேம்ஸ் றொட்றிகாஸ் பெற்றிருந்ததோடு, ஈக்குவடோர் சார்பாக, றொபேர்ட் அர்பொலெடா, ஏஞ்சல் மெனா, மிஷேல் எஸ்ராடா, ஸ்கேவியர் அர்ரெகா, கொன்ஸலோ பிளாட்டா, பெர்விஸ் எஸ்டுபினான் ஆகியோர் தலா ஒவ்வொரு கோலைப் பெற்றனர்.

இந்நிலையில், வெனிசுவேலாவில் நடைபெற்ற சிலி, வெனிசுவேலாவுக்கிடையிலான போட்டியில் 1-2 என்ற கோல் கணக்கில் சிலி தோற்றது. சிலி சார்பாகப் பெறப்பட்ட கோலை ஆர்துரோ விடால் பெற்றதோடு, வெனிசுவேலா சார்பாக, லூயிஸ் மாகோ, சலோமன் றொன்டன் ஆகியோர் தலா ஒவ்வொரு கோலைப் பெற்றனர்.

இதேவேளை, உருகுவேயில் நடைபெற்ற உருகுவே, பிரேஸிலுக்கிடையிலான போட்டியில் 2-0 என்ற கோல் கணக்கில் பிரேஸில் வென்றது. பிரேஸில் சார்பாக, ஆர்தர் மெலோ, றிச்சர்லிஸன் ஆகியோர் தலா ஒவ்வொரு கோலைப் பெற்றனர்.