கெட்டாஃபேயிடம் தோற்ற மட்ரிட்

ஸ்பானிய கால்பந்தாட்டக் கழகங்களுக்கிடையிலான லா லிகாத் தொடரில், கெட்டாஃபேயின் மைதானத்தில் ஞாயிற்றுக்கிழமை (09) நடைபெற்ற அவ்வணியுடனான போட்டியில் 1-2 என்ற கோல் கணக்கில் அத்லெட்டிகோ மட்ரிட் தோற்றது.

அத்லெட்டிகோ சார்பாகப் பெறப்பட்ட கோலை அலெக்ஸான்டர் சொர்லொத் பெற்றதோடு, கெட்டாஃபே சார்பாகப் பெறப்பட்ட இரண்டு கோல்களையும் மெளரோ அரம்பரி பெற்றிருந்தார்.

லா லிகா புள்ளிகள் பட்டியலில் தலா 57 புள்ளிகளை பார்சிலோனாவும், நடப்புச் சம்பியன்களான றியல் மட்ரிட்டும் பெற்றுள்ளபோதும் அவற்றுக்கிடையேயான போட்டி முடிவுகளின்படி முதலாமிடத்தில் பார்சிலோனாவும், இரண்டாமிடத்தில் றியல் மட்ரிட்டும் காணப்படுகின்றன. 56 புள்ளிகளுடன் மூன்றாமிடத்தில் அத்லெட்டிகோ மட்ரிட்டும், 49 புள்ளிகளுடன் நான்காமிடத்தில் அத்லெட்டிக் பில்பாவோவும் காணப்படுகின்றன. இதில் பார்சிலோனா மற்றைய அணிகளை விட ஒரு போட்டி குறைவாக விளையாடியுள்ளது.