சமநிலையில் மியூனிச் - பேர்லின் போட்டி

ஜேர்மனியக் கால்பந்தாட்டக் கழகங்களுக்கிடையிலான புண்டெஸ்லிகா தொடரில், யூனியன் பேர்லினின் மைதானத்தில் சனிக்கிழமை (15) நடைபெற்ற அவ்வணியுடனான போட்டியை 1-1 என்ற கோல் கணக்கில் பயேர்ண் மியூனிச் சமப்படுத்தியது.

மியூனிச் சார்பாகப் பெறப்பட்ட கோலை லெரோய் சனே பெற்றதோடு, பேர்லின் சார்பாகப் பெறப்பட்ட கோலை பெனெடிக்ட் ஹொல்லர்பச் பெற்றிருந்தார்.

இதேவேளை தமது மைதானத்தில் நடைபெற்ற பொரூசியா டொட்டமுண்டுடனான போட்டியை 2-0 என்ற கோல் கணக்கில் ஆர்.பி லெய்ப்ஸிக் வென்றது. லெய்ப்ஸிக் சார்பாக ஸ்கெவி சிமொன்ஸ், லொய்ஸ் ஒபென்டா ஆகியோர் தலா ஒவ்வொரு கோலைப் பெற்றனர்.

புண்டெலிஸ்கா புள்ளிகள் பட்டியலில் 62 புள்ளிகளுடன் முதலிடத்தில் மியூனிச் உள்ளது. 53 புள்ளிகளுடன் இரண்டாமிடத்தில் நடப்புச் சம்பியன்களான பயெர் லெவர்குசனும், 45 புள்ளிகளுடன் மூன்றாமிடத்தில் மைன்ஸும், 42 புள்ளிகளுடன் நான்காமிடத்தில் ஐன்ரச்ட் பிராங்க்பேர்ட்டும் காணப்படுகின்றது. இதில் மற்றைய அணிகளை விட மியூனிச்சும், மைன்ஸும் ஒரு போட்டி அதிகமாக விளையாடியுள்ளது.