பரிஸ் ஸா ஜெர்மைன், அத்லெட்டிகோ வென்றன

ஐரோப்பிய கால்பந்தாட்டக் கழகங்களுக்கிடையிலான சம்பியன்ஸ் லீக் குழுநிலைப் போட்டிகளில், நேற்று  இடம்பெற்ற போட்டிகளில், பரிஸ் ஸா ஜெர்மைன், அத்லெட்டிகோ மட்ரிட், செல்சி, பெயார்ண் மியூனிச் ஆகிய அணிகள் வெற்றிபெற்றன.

பிரெஞ்சு லீக் 1 கழகமான பரிஸ் ஸா ஜெர்மைன், 7-1 என்ற கோல் கணக்கில், ஸ்கொட்லாந்துக் கழகமான செல்டிக்கை வென்றது. பரிஸ் ஸா ஜெர்மைன் சார்பாக, நேமர், எடின்சன் கவானி ஆகியோர் தலா 2 கோல்களையும் கிலியான் மப்பே, மார்கோ வெராட்டி, டனி அல்விஸ் ஆகியோர் தலா ஒவ்வொரு கோலைப் பெற்றனர். செல்டிக் சார்பாகப் பெறப்பட்ட கோலை மூஸா டெம்பிலி பெற்றார்.

ஸ்பானிய லா லிகா கழகமான அத்லெட்டிகோ மட்ரிட், 2-0 என்ற கோல் கணக்கில், இத்தாலிய சீரி ஏ கழகமான றோமாவை வென்றது. அத்லெட்டிகோ மட்ரிட் சார்பாக, அந்தோனி கிறீஸ்மன், கெவின் கமெய்ரோ ஆகியோர் தலா ஒவ்வொரு கோலைப் பெற்றனர்.

இங்கிலாந்து பிறீமியர் லீக்கின் நடப்புச் சம்பியன்களான செல்சி, 4-0 என்ற கோல் கணக்கில், அஸர்பைஜான் கழகமான எப்.கே குவாராபக்கை வென்றது. செல்சி சார்பாக, வில்லியான் இரண்டு கோல்களையும் ஈடின் ஹஸார்ட், சீஸ்க் பப்ரிகாஸ் ஆகியோர் தலா ஒவ்வொரு கோலையும் பெற்றனர்.

ஜேர்மனியக் கழகமான பெயார்ண் மியூனிச், 2-1 என்ற கோல் கணக்கில், பெல்ஜியக் கழகமான ஆர்.எஸ்.சி அன்டர்லெச்டை வென்றது. பெயார்ண் மியூனிச் சார்பாக, றொபேர்ட் லெவன்டோஸ்கி, கொரென்டின் டொலிஸோ ஆகியோர் ஆகியோர் தலா ஒவ்வொரு கோலைப் பெற்றனர். ஆர்.எஸ்.சி அன்டர்லெச்ட் சார்பாகப் பெறப்பட்ட கோலை சொபியானே ஹன்னி பெற்றிருந்தார்.

இந்நிலையில், இங்கிலாந்து பிறீமியர் லீக் கழகமான மன்செஸ்டர் யுனைட்டெட், 0-1 என்ற கோல் கணக்கில், சுவிற்ஸர்லாந்துக் கழகமான எப்.சி பேஸிலிடம் தோல்வியடைந்தது. எப்.சி பேஸில் சார்பாகப் பெறப்பட்ட கோலை மிச்செல் லங் பெற்றார்.

இதேவேளை, ஸ்பானிய லா லிகா கழகமான பார்சிலோனா, கடந்த சம்பியன்ஸ் லீக்கில் இரண்டாமிடம் பெற்ற இத்தாலிய சீரி ஏ கழகமான ஜுவென்டஸ் ஆகியவற்றுக்கிடையேயான போட்டியில் இரண்டு அணிகளும் கோலெதனையும் பெறாத நிலையில் போட்டி சமநிலையில் முடிவடைந்தது.