பஹ்ரெய்ன் கிரான்ட் பிறிக்ஸை வென்றார் நிக்கோ றொஸ்பேர்க்

தனது சக அணி வீரரான பிரித்தானியாவின் லூயிஸ் ஹமில்டன் முதலாவது சுற்றில் மோதியமையையடுத்து மெர்சிடிஸ் அணியின் ஜெர்மனிய சாரதியான நிக்கோ றொஸ்பேர்க் இலகுவாக பஹ்ரெய்ன் கிரான்ட் பிறிக்ஸை வென்றார்.

மெதுவான ஆரம்பம் மற்றும் வில்லியம்ஸ் அணியின் பின்லாந்து சாரதியான வல்ட்டேரி போட்டாஸுடன் முதலாவது திருப்பத்தில் மோதியமை காரணமாக முதலாவது சுற்றில் ஏழாம் நிலைக்குச் சென்ற லூயிஸ் ஹமில்டன், பின்னர் சுதாகரித்துக் கொண்டு பந்தயத்தை தொடர்ந்தாலும் இரண்டாமிடம் பெற்ற பெராரி அணியின் பின்லாந்துச் சாரதியான கிமி ரைக்கோனனை பிடிக்க முடியவில்லை.

இந்த பஹ்ரெய்ன் கிரான்ட் பிறிக்ஸுடன் சேர்த்து, கடந்த வருடம் மெக்ஸிக்கோவிலிருந்து இது வரை தொடர்ச்சியாக ஐந்து பந்தயங்களில் வென்ற நிக்கோ றொஸ்பேர்க், லூயிஸ் ஹமில்டனை விட 17 புள்ளிகள் அதிகமாகப் பெற்றுள்ளார்.

மேற்படி பஹ்ரெய்ன் கிரான்ட் பிறிக்ஸில் நான்காமிடத்தை ரெட் புல் அணியின் அவுஸ்திரேலிய சாரதியான டேனியல் ரிக்கார்டோவும் ஐந்தாமிடத்தை ஹாஸ் எஃப்1 அணியின் பிரான்ஸ் சாரதியான றொமைன் க்ரோஸ்ஜீனும் பெற்றனர்.