பிறீமியர் லீக்: வென்றது சிற்றி

இங்கிலாந்து கால்பந்தாட்டக் கழகங்களுக்கிடையிலான பிறீமியர் லீக் தொடரில், நேற்று  இடம்பெற்ற போட்டியொன்றில், 2-1 என்ற கோல் கணக்கில் வெஸ்ட் ஹாம் யுனைட்டெட்டை மன்செஸ்டர் சிற்றி வென்றது. மன்செஸ்டர் சிற்றி சார்பாக, நிக்கொலஸ் ஒட்டமென்ட்டி, டேவிட் சில்வா ஆகியோர் தலா ஒவ்வொரு கோலைப் பெற்றனர். வெஸ்ட் ஹாம் யுனைட்டெட் சார்பாகப் பெறப்பட்ட கோலை அஞ்சலோ ஒக்பொன்னா பெற்றார்.

இந்நிலையில், குறித்த போட்டியுடன் சேர்த்து இப்பருவகால பிறீமியர் லீக்கில் 13 வெற்றிகளை தொடர்ச்சியாகப் பெற்றுள்ள மன்செஸ்டர் சிற்றி, பிறீமியர் லீக் பருவகாலமொன்றில் அதிக வெற்றிகளை தொடர்ச்சியாகப் பெற்ற கழகமென்ற சாதனையைச் சமப்படுத்தியுள்ளது.