மேற்கிந்தியத் தீவுகளை வென்றது பங்களாதேஷ்

மேற்கிந்தியத் தீவுகள், பங்களாதேஷ் அணிகளுக்கிடையிலான மூன்று போட்டிகள் கொண்ட இருபதுக்கு – 20 சர்வதேசப் போட்டித் தொடரில், ஐக்கிய அமெரிக்காவின் லெளடர்ஹில்லில் இன்று காலை இடம்பெற்ற இரண்டாவது போட்டியில் பங்களாதேஷ் வென்றது.

இப்போட்டியில், முதலில் துடுப்பெடுத்தாடிய பங்களாதேஷ், 20 ஓவர்களில் 5 விக்கெட் இழப்புக்கு 171 ஓட்டங்களைப் பெற்றது. துடுப்பாட்டத்தில், தமிம் இக்பால் 74 (44), அணித்தலைவர் ஷகிப் அல் ஹஸன் 60 (38) ஓட்டங்களைப் பெற்றனர். பந்துவீச்சில், அஷ்லி நேர்ஸ், கீமோ போல் ஆகியோர் தலா 2 விக்கெட்டுகளைக் கைப்பற்றினர்.

பதிலுக்கு, 172 ஓட்டங்களை வெற்றியிலக்காகக் கொண்டு துடுப்பெடுத்தாடிய மேற்கிந்தியத் தீவுகள், 20 ஓவர்களில் 9 விக்கெட்டுகளை இழந்து 159 ஓட்டங்களையே பெற்று 12 ஓட்டங்களால் தோல்வியடைந்தது. துடுப்பாட்டத்தில், றொவ்மன் பவல் 43 (34), அன்ட்ரே பிளட்சர் 43 (38) ஓட்டங்களைப் பெற்றனர். பந்துவீச்சில், நஸ்முல் இஸ்லம், முஸ்தபிசூர் ரஹ்மான் ஆகியோர் தலா 3, ஷகிப் அல் ஹஸன் 2 விக்கெட்டுகளைக் கைப்பற்றினர்.

இப்போட்டியின் நாயகனாக தமிம் இக்பால் தெரிவானார்.