றோமாவை வீழ்த்திய நாப்போலி

இத்தாலியக் கால்பந்தாட்டக் கழகங்களுக்கிடையிலான சீரி ஏ தொடரில், நாப்போலியின் மைதானத்தில் நேற்று அதிகாலை நடைபெற்ற அவ்வணிக்கும் றோமாவுக்குமிடையிலான போட்டியில் 4-0 என்ற கோல் கணக்கில் நாப்போலி வென்றது.

நாப்போலி சார்பாக, லொரென்ஸோ இன்சீனியா, பேபியன் ருய்ஸ், ட்ரைஸ் மேர்ட்டன்ஸ், மத்தியோ பொலிட்டானோ ஆகியோர் தலா ஒவ்வொரு கோலைப் பெற்றனர்.

இந்நிலையில், லேஸியோவின் மைதானத்தில் நேற்று முன்தினமிரவு நடைபெற்ற அவ்வணிக்கும், உடினீஸுக்குமிடையிலான போட்டியில் 1-3 என்ற கோல் கணக்கில் லேஸியோ தோற்றது. லேஸியோ சார்பாகப் பெறப்பட்ட கோலை சிரோ இம்மொபைலி பெற்றிருந்தார். உடினீஸ் சார்பாக, டொல்கே அர்ஸ்லன், இக்னாஸியோ, புஸெல்டோ, பெர்ணான்டோ பொரெஸ்டியெரி ஆகியோர் தலா ஒவ்வொரு கோலைப் பெற்றனர்.