இந்திய அணிக்கு 0-4 தோல்வி நிச்சயம்: மக்ராத்

இந்திய கிரிக்கெட் அணி நேற்று (20) அவுஸ்திரேலியாவிற்கான கிரிக்கெட் சுற்றுப் பயணத்தை ஆரம்பித்துள்ளது. இந்த நிலையில் அவுஸ்திரேலியா வரும் இந்தியா கிரிக்கெட் அணி, டெஸ்ட் போட்டிகளில் சகல போட்டிகளிலும் தோல்வியடையும் என அவுஸ்திரேலியா அணியின் முன்னாள் வீரர் கிளன் மக்ராத் கூறியுள்ளார். தரவுகள் இதை உறுதி செய்வதாகவும் அவர் கூறியுள்ளார். 

 

இந்திய அணியானது அவுஸ்திரேலியாவில் விளையாடிய 23 டெஸ்ட் போட்டிகளில் இரண்டில் மாத்திரமே வெற்றி பெற்றுள்ளன. சச்சின், டிராவிட், லக்ஸ்மன் போன்றவர்கள் இருக்கும் போதே இந்திய அணி அந்த வெற்றிகளைப் பெற்றன. அது கூட மிகுந்த சிரமப்பட்டு. டோனியின் பையன்கள் வேகமான பந்து உயர எழும் ஆடுகளங்களில் மிக மோசமாக செயற்படுவார்கள் என மேலும் அவர் கூறியுள்ளார். 

 

இந்தியா அணி இங்கிலாந்திற்கு செல்லும் போதும் இந்தியா அணி சரியான தயார்படுத்தல்கள் இன்றியே சென்றது என மக்ராத் கூறி இருந்தார். அதேபோன்று ஆஷஸ் தொடரின் முடிவுகளையும் சரியாக அவர் கணித்து இருந்தார். இந்த நிலையில் இந்த கணிப்பு சரியாக அமையுமா என்பது கேள்வியே. அதற்கான வாய்ப்புகள் இல்லாமலும் இல்லை. ஆனாலும் தடுமாறி வரும் அவுஸ்திரேலியாவின் துடுப்பாட்ட வீரர்கள் தொடரை முழுமையாக வெற்றி பெற ஓட்டங்களை பெரியளவில் பெறமுடியுமா எனபதும் கேள்வியாகவே உள்ளது. தொடர் நிறைவில் அனைத்துக் கேள்விகளுக்கும் பதில் கிடைக்கும்.