தடைசெய்யப்பட்ட வலைகளைப் பயன்படுத்திய 6 மீனவர்கள் கைது

-வா.கிருஸ்ணா

மட்டக்களப்பு, சத்துருக்கொண்டான் வாவியில் தடைசெய்யப்பட்ட வலைகளைப் பயன்படுத்தி மீன்பிடியில் ஈடுபட்டதாகக் கூறப்படும் மீனவர்கள் 06 பேரை இன்று வியாழக்கிழமை காலை கைதுசெய்துள்ளதாகக் கடற்றொழில் நீரியல்வளத்துறை திணைக்களத்தின் மட்டக்களப்பு மாவட்ட கடற்றொழில் பரிசோதகர் த.பாலமுகுந்தன் தெரிவித்தார்  

குறித்த வாவியில்; தடைசெய்யப்பட்ட வலைகளைப் பயன்படுத்தி மீன்பிடி நடவடிக்கை இடம்பெறுவதாக தமக்குத் தகவல் கிடைத்தது. இதனை அடுத்து, அங்கு சென்று சோதனை மேற்கொண்டபோது, குறித்த மீனவர்கள் தடைசெய்யப்பட்ட வலைகளைப் பயன்படுத்தி மீன்பிடியில் ஈடுபட்டமை தெரியவந்தது.

இந்நிலையில், குறித்த மீனவர்களைக் கைதுசெய்துள்ளதுடன், அவர்களிடமிருந்து சுமார் 3   இலட்சம் ரூபாய் பெறுமதியான  தடைசெய்யப்பட்ட வலைகளையும் சுமார் 50 கிலோ மீன்களையும்; கைப்பற்றியுள்ளதாகவும் அவர் கூறினார்.