மட்டக்களப்பில் 24,948 வீடுகளில் மின்சார வசதியில்லை

-ஏ.எச்.ஏ.ஹுஸைன்

மட்டக்களப்பு மாவட்டத்தில் 24,948 குடும்பங்கள் மின்சார வசதியற்று இருப்பதாக கடந்த வருடம் மேற்கொள்ளப்பட்ட கணக்கெடுப்பின் மூலம் தெரியவந்துள்ளதாக மாவட்ட திட்டமிடல் பணிப்பாளர் ஆர்.நெடுஞ்செழியன் தெரிவித்தார்.

மேலும், இம்மாவட்டத்தில்  2,466 வீடுகள் மின்விநியோக மார்க்கங்கள் அற்ற இடங்களில் உள்ளதாகவும் அவர் கூறினார்.

இவ்வாறிருக்க, 22,482 வீடுகள் மின்விநியோகம் உள்ள பகுதிகளில் இருந்தபோதும், வறுமை காரணமாக அவ்வீட்டிலுள்ளவர்கள் மின் இணைப்பைப் பெறவில்லை.

ஆகக் கூடுதலாக வாகரைப் பிரதேச செயலாளர் பிரிவில் 4,270 குடும்பங்களும் ஏறாவூர்ப்பற்று பிரதேச செயலாளர் பிரிவில் 4,157 குடும்பங்களும் கிரான் பிரதேச செயலாளர் பிரிவில் 3,432 குடும்பங்களும் வவுணதீவுப் பிரதேச செயலாளர் பிரிவில் 3,039 குடும்பங்களும் வெல்லாவெளிப் பிரதேச செயலாளர் பிரிவில் 2,562 குடும்பங்களும் மின்சார வசதியற்றுள்ளதாகவும் அவர் கூறினார்.   

இக்குடும்பங்கள் மண்ணெண்ணெய்  விளக்குகளை நம்பியே காலங்கழிக்கின்றன.