மட்டக்களப்பில் இவ்வருடத்தில் டெங்கு நோயாளர்களின் எண்ணிக்கை அதிகரிப்பு

-ஏ.எச்.ஏ.ஹுஸைன்

மட்டக்களப்பில் கடந்த வருடத்துடன் ஒப்பிடுகையில, இந்த வருடத்தின் முதல் 3 மாதங்களிலும் டெங்கு நோயால் பாதிக்கப்பட்டவர்களின் எண்ணிக்கை அதிகரித்துக் காணப்படுவதாக மட்டக்களப்பு போதனா வைத்தியசாலைப்; பணிப்பாளர், வைத்தியக் கலாநிதி எம்.எஸ்.இப்றாலெப்பை தெரிவித்தார்.

கடந்த வருடத்தில்; மொத்தமாக 501 டெங்கு நோயாளர்களே மட்டக்களப்பில் அடையாளம் காணப்பட்டிருந்தார்கள்.
ஆனால், இந்த வருடத்தில் ஜனவரியில் 306 பேரும் பெப்ரவரியில் 479 பேரும் மார்ச்சில் 746 பேருமாக மொத்தம் 1,531 டெங்கு நோயாளர்கள் அடையாளம் காணப்பட்டுள்ளார்கள் எனவும் அவர் கூறினார்.

தற்போது மட்டக்களப்பு போதனா வைத்தியசாலையில் 94 டெங்கு நோயாளர்கள் சிகிச்சை பெற்று வருகின்றார்கள் எனவும் அவர் கூறினார்.

இதற்கு முன்னர் சாதாரண காலத்தில் மட்டக்களப்பு போதனா வைத்தியசாலைக்கு வரும் நோயாளர்களில்  நாளொன்றுக்கு 300 தொடக்கம் 350 பேர் வரையே இரத்தப் பரிசோதனைக்கு உட்படுத்தப்பட்டிருந்தார்கள்.

ஆனால், தற்போது நாளொன்றுக்கு 950 தொடக்கம் 1,000 பேருக்கு இரத்தப் பரிசோதனைக்கு உட்படுத்தப்பட்டு வருகின்றார்கள் எனவும் அவர் கூறினார்.