ஏறாவூருக்கு கட்டார் அகடமி பிரதிநிதிகள் குழு விஜயம்

(எம்.சுக்ரி,ஆர்.அனுருத்தன்)

மட்டக்களப்பு மாவட்டத்தின் ஏறாவூர் பகுதிக்கான  விஜயமொன்றை கட்டார் அகடமி பிரதிநிதிகள் குழுவினர் நேற்று திங்கட்கிழமை மேற்கொண்டனர்.    

ஏறாவூர் கல்வி அபிவிருத்தி நிலையத்தின் அழைப்பின் பேரில் ஏறாவூருக்கு விஜயம் செய்த இவர்கள், ஏறாவூர் நகர சபைத் தலைவர் அலிசாகீர் மௌலானாவை ஏறாவூர் நகர சபை அலுவலகத்தில் சந்தித்தனர்.

ஏறாவூரில் மாதிரி சந்தைக்கட்டிடம்,  பொதுநூலகம், கணினி பயற்சிக்கூடம் என்பவற்றை நிர்மாணித்துத் தருமாறு ஏறாவூர் நகர சபை தலைவர் அலிசாஹீர் மௌலான கட்டர் அகடமி பிரதிநிதிகளிடம் வேண்டுகோள் விடுத்தார்.

கட்டார் அகடமி குழுவினர் ஏறாவூரிலுள்ள அலிகார் தேசிய பாடசாலை, மிச்சி நகர் அரசினர் கலவன் பாடசாலை, ஏறாவூர் சிறுவர் பராமரிப்பு நிலையம், ஏறாவூர் விசேட தேவை பாடசாலை ஆகியவற்றுக்கு மடிக்கணினிகளையும் வழங்கினர். அத்துடன், தாமரைக்கேணியிலுள்ள குடியேற்ற கிராம மக்களுக்கு 3,500 ரூபா பெறுமதியான உலர் உணவுப்பொருட்களையும் வழங்கியதுடன், பாலர் பாடசாலை ஆசிரியைகளுக்கான பயற்சி செயலமர்வொன்றையும் நடத்தினர்.