கிழக்கு மாகாண சபையின் அடுத்த அமர்வு திங்கட்கிழமை

(ரி.லோஹித்)

நாடு, நகர திட்டமிடல் திருத்தச் சட்டமூலம் தொடர்பான அடுத்த விவாதம் எதிர்வரும் 28ஆம் திகதி நடைபெறும் என அறிவிக்கப்பட்டிருந்த நிலையில், அதற்கு ஒரு நாள் முன்னதாக மாகாண சபை அமர்வு நடைபெறும் என கிழக்கு மாகாண சபையின் தவிசாளர் எச்.எம்.எம்.பாயிஸ் தெரிவித்துள்ளார்.

தற்போது மாகாண சபைகளின் ஒப்புதலுக்காக அனுப்பிவைக்கப்பட்டுள்ள நாடு,  நகர திருத்தச் சட்டமூலம் கடந்த 13ஆம் திகதி கிழக்கு மாகாண சபையின் அங்கீகாரத்திற்கு சமர்ப்பிக்கப்பட்டபோது, அதில் குறிப்பிட்ட சில மாற்றங்களை செய்து தரும்படி மீண்டும் அனுப்பிவைக்கப்பட்டிருந்தது. அத்துடன் எதிர்க்கட்சியினரின் எதிர்ப்பும் கடுமையாக இருந்தது.

இதனைத் தொடர்ந்து எதிர்வரும் 28ஆம் திகதி சபை அமர்வு நடைபெறும் என தவிசாளர் பாயிஸ் அறிவித்திருந்தார். தற்போது இச்சபை  27ஆம் திகதி கூடும் என அவர் அறிவித்திருக்கிறார்.

இதன்போது நாடு நகர திருத்தச் சட்டமூலம் திருத்தங்களுடன் சமர்ப்பிக்கப்படும் என எதிர்பார்க்கப்படுகிறது.