புதுக்குடியிருப்பில் ஒருவர் அடித்துக்கொலை

(ரி.லோஹித், எம்.சுக்ரி)

மட்டக்களப்பு மாவட்டத்தின் காத்தான்குடி பொலிஸ் பிரிவுக்குட்பட்ட புதுக்குடியிருப்பு பகுதியில் இன்று பிற்பகல் ஒருவர் அடித்துக் கொலைசெய்யப்பட்டுள்ளார்.

புதுக்குடியிருப்பு, புளியடி வீதியில் இடம்பெற்ற இந்த சம்பவத்தில் குறித்த பகுதியை சேர்ந்த மகேந்திரன் (44வயது) என்பவரே உயிரிழந்துள்ளதாக காத்தான்குடி பொலிஸ் நிலைய மாவட்ட குற்றப்புலனாய்வுத்துறை அதிகாரி எம்.பி.எம்.தாஹா தெரிவித்தார்.

புளியடி வீதியில் ஒரு குழுவினர் உரையாடிக்கொண்டிருந்தபோது ஏற்பட்ட முறுகலையடுத்தே குறித்த நபர் கடுமையாக தாக்கப்பட்டதாகவும் படுகாயமடைந்த அவர்  ஆரையம்பதி மாவட்ட வைத்தியசாலைக்கு கொண்டுசெல்லப்பட்டபோது உயிரிழந்ததாகவும் குற்றப்புலனாய்வுத்துறை அதிகாரி எம்.பி.எம்.தாஹா தெரிவித்தார்.

சம்பவம் தொடர்பில் மூவர் தொடர்புபட்டுள்ளதாக  ஆரம்பக்கட்ட விசாரணையில் தெரியவந்துள்ளதாக தெரிவித்த அவர், ஒருவர் கைதுசெய்யப்பட்டுள்ளதாகவும் அவர் தெரிவித்தார். இச்சம்பவம் தொடர்பில் காத்தான்குடி பொலிஸார் விசாரணைகளை மேற்கொண்டுவருகின்றனர்.