இரு வேறு பகுதிகளில் மண்சரிவு; ஆறு வீடுகள் சேதம்

எம்.கிருஸ்ணா 

அம்பகமுவ பிரதேச செயலகத்திற்குட்பட்ட இருவேறு பகுதிகளில் ஏற்பட்ட மண்சரிவில் ஆறு குடியிருப்புகள் சேதமாகியுள்ளன. 

வட்டவளை பொலிஸ் பிரிவிற்கு உட்பட்ட  வெளிஓயா கீழ் பிரிவில் இன்று அதிகாலை  மண்மேடுடன் கற்பாறைகள் சரிந்து வீழ்ந்ததில் மூன்று வீடுகள் கடும்  சேதத்திற்குள்ளாகியுள்ளன. 

அதே வேளை பொகவந்தலாவை பொலிஸ் பிரிவிற்கு உட்பட்ட லொயினோன் தோட்டப் பகுதியில் நண்பகல் மண்மேடு சரிந்து வீழ்ந்ததில் மூன்று வீடுகள் பகுதியளவில் சேதமாகியுள்ளன.

இந்நிலையில் மண்சரிவினால் ஏற்பட்ட சேத விபரம் தொடர்பில்  கிராம உத்தியோகஸ்தர்கள் விசாரணைகளை முன்னெடுத்து வருவதாகக் கூறப்படுகின்றது.